Áli táýelsizdik almaı turǵanda shyqqan «Egemendi Qazaqstannyń» 20 myńynshy nómirin qolǵa aldyq. Nazarymyz birden úlken jazýmen jazylǵan gazet ataýynyń tóbesindegi «Azattyq. Teńdik. Týystyq!» degen uranǵa tústi. Al osy uran azattyq ańsaǵan eldiń asqaq úni emeı nemene?!
100 jyldyq tarıhy bar «Egemen Qazaqstan» gazetiniń 20 myńynshy nómiri táýelsizdik tańyna úsh aı qalǵanda, 1991 jyldyń 28 qyrkúıeginde shyǵypty. Tarıhı sannyń basty betinde áýeli oqyrmanǵa arnaý sóz aıtylǵan, sodan soń jýrnalıst Qalı Sársenbaıdyń «Qasqaldaq» áni qalaı aıtylyp júr?» degen materıaly basylypty. Bul týraly birinshi betke berýdiń ózi batyldyq bolǵany anyq. Gazettiń oń jaq shetindegi baǵanada sheteldik BAQ-tyń mańyzdy jańalyqtaryn bergen. Sonyń ishinde «Nemis áýe tolqyny», «Amerıka daýysy», «Azattyq» degen taqyrypshalar oqyrman tanymyn qurlyqaralyq habarlarmen keńeıtkenin kórsetedi. Basty bettiń tómengi tusynda gazettiń redaksııasy «Osy nómirden oqıtyndaryńyz» dep oqyrmandy tolymdy taqyryptarmen qyzyqtyrǵan.
Gazettiń «Alysta júrgen aǵaıyn» aıdarymen Shyǵys Qazaqstan oblysynan arnaýly tilshi Keńeshan Zákenniń «Ata qonysqa kósh jetti» degen súıinshi habary eldi eleń etkizgeni sózsiz. Osy maqalanyń joǵary jaǵynda atalǵan aıdarmen keıingi 2-3 jyldan beri turaqty túrde maqalalar shyǵyp kele jatqany jazylǵan. Jýrnalıstiń «Iá, adam óz Otanynda, qandas baýyrlarynyń ortasynda ǵana baqytty sezinedi. Muny biz kezinde taǵdyrdyń talaı soqpaqty jolyna túsip, qalyń eli qazaq jurtynan bólinip, basqa elde turaqtap qalǵan qandas baýyrlarymyzben áńgimeleskende anyq baıqadyq» degeni tarydaı shashyraǵan qandastarymyzdyń elge oralýyna túrtki bolǵandaı. Mine, bul kósh áli de jalǵasyp keledi.
Atalǵan nómirdegi taǵy bir elemeı ótip ketýge kelmeıtin dúnıe «Qonysynda el otyr» degen atpen shyqqan maqala boldy. «Aral taǵdyry – adam taǵdyry» atty aıdarmen shyqqan materıal týraly redaksııa «Aral óńiriniń taǵdyry – qashanda gazetimizdiń nazarynda. Bul rette gazet betinde ǵalymdar, mamandar, eńbek adamdary, jýrnalıster kóptiń kókeıinde júrgen máseleler jóninde oı qozǵap, naqty sharalardy júzege asyrýǵa muryndyq boldy. Osy taqyrypta kópten qalam tartyp júrgen avtorlarymyzdyń biri Shákizat Dármaǵanbetovtiń búgingi maqalasynda apat aımaǵynda elge qamqorlyq kórsetip júrgen azamattardyń ıgi isteri sóz bolady» dep túsinikteme beripti.
Memlekettik syılyqtyń ıegeri, jazýshy Dýlat Isabekovtiń «Júz jyldyq arman» áńgimesi oqyrman qaýymnyń dál osy nómirdi asyǵa kútýine yqpal etken shyǵar. Sebebi gazetimizdiń 20 myńynshy nómirinde áńgimeniń sońy berilgen. Týyndydan ózin kórgendeı kúı keshken árbir oqyrman «Qoıandy» kolhozynyń halin, Jeldibaıdyń jaıyn bilgisi keledi ǵoı.
«Egemendi Qazaqstannyń» tilshisi Kópen Ámir «Múıiztumsyq» aıdaryna feleton jazypty. Avtordyń sóz basyndaǵy «Áý basta abyr-dabyr, apaı-topaı, ýlyǵan-shýlyǵan bop bastalǵan aýyldyń daýy Almatyǵa deıin alaquıyndatyp soqsa amal ne?» degeni oqyǵan jandy ilestirip áketedi.
Bas basylymda kóterilgen problemalyq maqalalardan, ondaǵy ashyq aıtylǵan syndardan jaýapty jandar, tıisti mekemeler qorytyndy shyǵaryp otyrady. Oǵan 20 myńynshy nómirdegi «Egemendi Qazaqstannyń synynan keıin» degen aıdarmen shyqqan materıaldaǵy myna mátin dálel bola alady:
«Qazaq KSR Halyqqa bilim berý mınıstrligi gazettiń 10 tamyzdaǵy sanynda jarııalanǵan «Tilimnen janym sadaǵa» atty maqalany mamandardy qatystyra otyryp talqylady. Maqalada oqytý mazmunyn jańartý jóninde oryndy máseleler kóterilgen. Osy baǵytta Y.Altynsarın atyndaǵy pedagogıkalyq ǵylymı zertteý ınstıtýty jalpy orta bilim beretin qazaq mektebiniń 5-11 klastaryna arnalǵan qazaq tili men ádebıeti pániniń tujyrymdamasyn jasap, qalyń kópshilikke usynady».
Kúni búginge deıin jalǵasqan jýrnalıstik jol, bas basylymnyń baǵyty – bul.