Tarbaǵataı Ulttyq parkiniń aýmaǵyndaǵy ushqan qusqa, jortqan ańǵa jylyna tórt ret sanaq júrgiziledi. Sonyń eń nátıjelisi – qysqy sanaq desedi mamandar. Jýyqta ǵana qoryqshylar park aýmaǵynda 17 arqardyń jaıylyp júrgenin kórgen.
«Qyzyl kitapqa» engen bul ıirmúıizdiler qazir taý etegine jaqyn júrgenmen, kóbi naýryzdyń sońyna qaraı Barqytbeldiń bıigine kóterilip ketedi. Álsiz, jaraly arqarlar ǵana qysqy mekenderinen uzap kete qoımaıtyn kórinedi. «Arqar órgen jerge yrys darıdy, ony kórgen adamnyń joly bolady» dep yrymdaıdy qazaq. Aı múıizdi, jup tuıaqty túz taǵylaryna aqparat jáne ekologııalyq monıtorıng bóliminiń ǵylymı qyzmetkerleri Rınat Qasymbekov pen ańshy-bıolog Azamat Rahımbekov dúrbi salyp, kórgen eken. Ústirtte ǵana 17 bas jaıylyp júrgen. Negizinen 10-15 daraqtan toptasyp, úıirimen júredi. Arqardyń irisi de osy Tarbaǵataı, Altaı taýlaryn meken etedi. Ǵylymı derekterge súıensek, salmaǵy 180 kelige deıin jetedi eken. Úskirik jelge, shyńyltyr aıazǵa óte tózimdi janýar. Kóbinese dárilik shópterdiń gúlimen qorektenedi. Qystyń kúni de osy shópterdi taýdyń bókterinen izdeıdi.
– Kıeli ańdy taýdyń etek jaǵynan kórip sanap, tirkep qoıdyq. Bul bir kúnde kózge túskenderi ǵana. Aldaǵy ýaqyttarda fototuzaq quryp qoısaq, sýretke túsetini anyq. Byltyr 200-deı bas sanaǵymyz, deıdi Rınat Qasymbekov.
Qoryqshylar sanaqtyń alǵashqy kúnderi taýdyń yńǵyl-jyńǵylyn jalpaq tabandy qar kólikterimen aralap shyqqan. Jol-jónekeı arqardan basqa, qasqyr, túlki, qoıannyń izderi de kezdesken. О́zderi de jıi kózge túsedi. Sanaqqa bilek sybana kiriskende kózben kórip qana emes, iz boıynsha da tirkeıdi. Fototuzaqqa túskender qosa esepke alynady. Qoradaǵy qoıdaı túgendep qoımasa da, mólsherin tirkep, ózderi qoryp júredi. Tarbaǵataıdyń tumsa tabıǵaty, ań-qustary, ósimdikteri – qoryqshylardyń qorǵaýynda.
Shyǵys Qazaqstan oblysy
Úrjar aýdany