Áneýgúni О́skemende Ertisten sý almaq bolyp, aǵyndy ózenge túsip ketken áıeldi qutqaryp qalǵan stýdent Sársen Amanjolov atyndaǵy altyn medalmen marapattaldy. Mundaı medal stýdenttiń keýdesine alǵash ret taǵyldy, dep habarlaıdy Egemen.kz
"Dene shynyqtyrý jáne sport" mamandyǵy boıynsha oqyp jatqan 2 kýrs stýdenti Artem Borovıkov Ertis ózenine batyp bara jatqan 61 jastaǵy áıeldi qutqaryp qalǵanyn óskemendikter jaqsy biledi. Artem Iýrevıch kúnniń sýyǵyna, ózenniń aǵysyna qaramastan keıýanany qutqarý úshin Ertiske qoıyp ketken. Aıtýynsha, qart anany jaǵaǵa alyp shyǵý ońaıǵa soqpaǵan. Aǵyndy sýdaǵy arpalysta ana júrek: «Balam, jibere sal, óziń de sýǵa batasyń ǵoı» dep daýystapty. Dese de, Artem aman alyp qalǵan.
Bul da batyrlyq. Osyny eskergen oqý ornynyń basshylyǵy Artem Borovıkovty Sársen Amanjolov atyndaǵy ýnıversıtet medalimen marapattap, Abaı atyndaǵy stıpendııa usyndy.
– Ýnıversıtettiń ǵylymı keńesi Artemniń barlyq oqý kezeńine grant bekitti. Sonymen qatar, bakalavrıatta oqýdy aıaqtaǵannan keıin magıstratýrada oqýyn jalǵastyrýǵa jol ashyldy. 70-jyldyq tarıhy bar ýnıversıtetimiz stýdenttiń erligin maqtan tutady, dedi S.Amanjolov atyndaǵy ýnıversıtettiń rektory Muhtar Tólegen.
Jýyqta О́skemen qalasy polısııa basqarmasynyń bastyǵy Andreı Mýla da Artemǵa baǵaly syılyq pen maqtaý qaǵazyn tabys etken. Ol stýdenttiń erligi jastarǵa úlgi ekenin erekshe atap ótti.