Sybaılas jemqorlyqqa qarsy is-qımyl agenttigi onlaın-dárister arqyly jastar arasynda parasattylyq qaǵıdattaryn ilgeriletýdi jalǵastyryp jatyr, dep habarlaıdy Egemen.kz
Kezekti «Adaldyq saǵatynyń» qonaǵy qazirgi tańda qazaq ádebıeti men mádenıetiniń damýyna eleýli úles qosyp júrgen belgili aqyn Qalqaman Sarın boldy.
Qazaqstan Jazýshylar odaǵynyń múshesi, halyqaralyq «Shabyt» festıvaliniń jáne «Daryn» memlekettik jastar syılyǵynyń laýreaty, «Altyn qalam» ádebı syılyǵynyń jeńimpazy, ári el ishinde tanymal talaı týyndynyń avtory Qalqaman Sarın óziniń ómirlik ustanymy retinde uly Abaıdyń taǵylymyn alǵa tartyp, «Meniń ómirdegi basty ustanymym – «Eńbek etseń erinbeı, toıady qarnyń tilenbeı» degen sózderin keltirip, jastardy tabandy eńbek etýge, tulǵalyq damýǵa jáne patrıot bolýǵa shaqyrdy.
Onyń pikirinshe, patrıot bolý úshin eń birinshi ár azamat óziniń tarıhyn oqýy kerek, sonda ǵana elin, jerin, babalaryn maqtan tutady.
Ol óziniń jeke ómiri men mansabynda jetistikke jetýge múmkindik bergen ádilettilik pen adaldyq sııaqty ómirlik qundylyqtarymen bólisti. Birinshi kezekte ata-anasyn maqtan tutatyndyǵyn aıta kele, «Anańnyń jaqqan oshaq otyna jylynyp, ákeńniń ekken emeniniń kóleńkesinde ósken urpaq jaman bolmaıdy» degendi eske saldy.
Parasatty qoǵam qurý úshin árbir adam óziniń sanasyn jaqsylyqqa qaraı ózgertip, parasatty urpaq tárbıelep, zańdy, ultmyzdyń dástúrin saqtaý kerektigin aıtyp oıyn túıindedi
«Adaldyq saǵatynyń» negizgi maqsaty – tanymal tulǵalardyń ómir jáne eńbek joly arqyly óskeleń urpaqtyń boıyna parasattylyq qundylyqtaryn sińirý jáne adaldyq, ádildik, ınabattylyq jáne senim sııaqty eń mańyzdy adamgershilik qundylyqtardy darytý.