Qazaqstan Respýblıkasy Densaýlyq saqtaý mınıstrliginiń «Qoǵamdyq densaýlyq saqtaý ulttyq ortalyǵy» (budan ári QDSUO) men Kolýmbııa Ýnıversıtetiniń Qoǵamdyq densaýlyq saqtaý mektebindegi ICAP ortalyǵynyń Qazaqstan Respýblıkasyndaǵy ókildigi (budan ári ICAP) arasynda yntymaqtastyq týraly memorandýmǵa qol qoıyldy. Joba «Shevron» kompanııasynyń bastamasy boıynsha jáne qarjylyq qoldaýymen júzege asyrylady. Bul týraly Túrkitildes jýrnalıster Qorynyń baspasóz qyzmeti habarlady.
ICAP ortalyǵy – AQSh, Nıý-Iork qalasynda ornalasqan Kolýmbııa ýnıversıtetindegi qoǵamdyq densaýlyq saqtaý mektebiniń quramyna kiredi. Ortalyqtyń basty maqsaty – januıalar men qoǵamdastyqtardyń densaýlyǵyn jaqsartý. Búgingi tańda ICAP – álemniń 30-dan astam elderiniń densaýlyq saqtaý mınıstrlikterine densaýlyq saqtaý júıesin nyǵaıtý, onyń ishinde medısına qyzmetkerlerin oqytý, densaýlyq saqtaý salasynda ınnovasııalyq tásilderdi ázirleý jáne engizý boıynsha konsýltasııalyq-ádistemelik kómek kórsetetin jáne aýqymdy ǵylymı jobalardy júzege asyratyn iri halyqaralyq uıymdardyń biri.
«Memorandýmǵa qol qoıý – COVID-19 epıdemııasyna qarsy is-qımyl boıynsha Densaýlyq saqtaý mınıstrligine keńes men praktıkalyq kómek kórsetýge jáne Qazaqstandaǵy medısınalyq uıymdarda ınfeksııalardyń aldyn alý men ınfeksııalyq baqylaý júıesin jaqsartýǵa baǵyttalǵan jobany iske asyrýdaǵy mańyzdy qadam» – deıdi kompanııa ókili Leıla Aıtmuhanova. «Biraq bul bizdiń birlesken alǵashqy jobamyz emes. О́tken jyly biz tájirıbe almasý úshin Qytaıdan dárigerlerdiń kelýine qoldaý kórsettik, medısına qyzmetkerlerine trenıngter uıymdastyrdyq, sondaı-aq COVID-19 aýrýyn emdeý úshin qajetti dári-dármekter men jeke qorǵanys quraldaryn satyp alýdy jáne jetkizýdi uıymdastyrdyq».
Qol qoıylǵan Memorandým sheńberinde Jumatov atyndaǵy Gıgıena jáne epıdemıologııa ǵylymı ortalyǵy negizinde qurylǵan medısınalyq kómekke baılanysty ınfeksııalardyń aldyn-alý jáne ınfeksııalyq baqylaý jónindegi úılestirý ortalyǵynyń áleýetin kúsheıtý boıynsha sharalar men qosymsha qarjylandyrý kózdelip otyr.
Sonymen qatar, QDSUO negizinde ınfeksııalyq baqylaý boıynsha Konsýltatıvtik keńes qurylady, jáne eldiń barlyq 17 aımaǵyndaǵy ár túrli deńgeıdegi medısınalyq uıymdarda ınfeksııalyq baqylaý júıesiniń negizgi komponentteriniń qazirgi jaǵdaıy anyqtalyp, baǵalanady. Baǵalaý nátıjesi boıynsha kópjaqty pikirtalas ótkizilip, Qazaqstandaǵy ınfeksııalyq baqylaý baǵdarlamalaryn baqylaý júıesiniń tıimdiligin arttyrý boıynsha usynystar ázirlenedi.
Sondaı-aq medısınalyq kómek kórsetýge baılanysty ınfeksııalarǵa baqylaý júrgizetin aqparattyq júıeni ázirleý jáne engizý josparlanýda. Praktıkalyq densaýlyq saqtaý júıesine kómek kórsetý úshin, QDSUO jáne ICAP birlesip, Dúnıejúzilik densaýlyq saqtaý uıymynyń materıaldary men Qazaqstan Respýblıkasynyń normatıvtik-quqyqtyq talaptary negizinde medısınalyq qyzmetkerler men medısınalyq uıymdardyń basshylaryn ınfeksııalardyń aldyn alý jáne baqylaý boıynsha oqytýdy josparlap otyr. Oqytý sertıfıkattary QDSUO atynan beriledi.
Jobany iske asyrý nátıjesinde medısınalyq uıymdarda ınfeksııalyq baqylaý baǵdarlamasynyń barlyq bólikteri jetildiriledi jáne QDSUO-nyń ınfeksııanyń aldyn alý jáne baqylaý sharalaryn úılestirý áleýeti arttyrylady. О́z kezeginde, bul Qazaqstan Respýblıkasynyń juqpaly aýrýlarmen kúreste týyndaıtyn zamanaýı qıynshylyqtaryna daıyndyǵyn kúsheıtedi.
ALMATY