Oblystyq PD apparattyq keńesinde tergeý jáne anyqtaý jelisi boıynsha «Úzdik maman» baıqaýynyń jeńimpazdary marapattaldy.
2020 jyldyń qorytyndysy boıynsha 16 jyldyq ótilimen Qyzyljar aýdany PB anyqtaýshysy Kúlmıra Jarmuqanova «úzdik anyqtaýshy» bolyp, Petropavl qalasyndaǵy Ekinshi polısııa bóliminde ekinshi jyl qyzmet atqaryp júrgen Úmitbek Farhadov «úzdik tergeýshi» dep tanyldy. Gramotalardy oblystyń bas polıseıi, polısııa polkovnıgi Marat Tólebaev tabystady.
Bul eki mamandyqtyń ıeleri de sotqa deıingi tergeýdi júzege asyrady. Sonyń ishinde tergeý bólinisi qylmystyń tek aýyr túrlerimen aınalysady, aıyrmashylyǵy sol ǵana. Kúlmıranyń eń sońǵy isteriniń biri alıment tóleýden jaltarýmen baılanysty boldy. Aýdan turǵyny sońǵy jyldary balasyna kómek berýden jaltaryp, esh jerde jumys istemegen. «Onyń tabys kózi bar ekendigin dáleldeý úshin kúsh-qýat jumsaý qajet boldy. Kúlmıra bir jylda 60 astam isti tergegen. Bizdiń jumysymyzda ádilettilikke qol jetkizý úshin barynsha kúsh jumsaýymyz qajet», - deıdi polısııa maıory Jarmuqanova.
Polısııanyń aǵa leıtenanty Ú.Farhadov: «Jumysym ózime unaǵasyn qıyndyqtarǵa mán bermeımin. Meniń jetistigim – kásip tańdaǵan kezde túsinistik bildirgen, únemi qoldap júretin ata-anamnyń jáne de Ekinshi polısııa bólimi bastyǵynyń orynbasary, polısııa maıory Gúlmıra Saǵıtovanyń eńbegi. Ol tergeýge jetekshilik etip, jas qyzmetkerlerge kásibı daǵdylaryn damytýǵa kómektesti», deıdi ol. Onyń sońǵy tergegen isi – top bolyp zorlyq-zombylyq kórsetýmen tonaýǵa baılanysty boldy. Sotqa deıingi tergeý 12-aq kúnge sozyldy. Nátıjesinde materıaldar sotqa tapsyrylyp, aıyptalýshylardyń barlyǵy jazaǵa tartyldy. Jalpy, ótken jyly Farhadov 95 qylmystyq isti tergedi.
Soltústik Qazaqstan oblysy