2009 jyly qurylysy bastalǵan oqý orny áli qańyrap bos tur. Pavlodar oblysy Ekibastuz qalasyndaǵy otyn-energetıkalyq keshen mamandaryn oqytýǵa arnalǵan nysan osydan bir jyldan astam ýaqyt buryn saltanatty túrde ashylý rásimi ótkenmen, bul oqý orny birde-bir stýdentti qabyldaǵan joq, dep habarlaıdy Egemen.kz.Bul týraly inbusiness.kz saıty málimdedi.
2006 jyly QR Bilim jáne ǵylym mınıstrligi eńbek naryǵyna energetıka, kómir óndirisi mamandary aýadaı qajet ekenin alǵa tartyp, Ekibastuz qalasynda dál osy sala qyzmetkerlerin daıyndaıtyn ortalyq salýdy uıǵardy. Sóıtip, qazynadan 4,5 mlrd teńge bólinip, 2009 jyly atalmysh oqý ornynyń qurylysy bastaldy. Bul ǵımarat 2011 jyly paıdalanýǵa berilip, jylyna 700 túlektiń qolyna dıplom ustatýǵa tıis edi. Arada 10 jyl ýaqyt ótkenmen, bilim ordasynan túlep ushqan eshkim joq. Sebebi QR Bilim jáne ǵylym mınıstrligi bekitken jobada drenajdyq júıe bolmaı shyqty.
Sonyń saldarynan ǵımarat el ıgiligine berilmeı jatyp-aq sýǵa «batty». 13 oqý korpýsy, 480 oryndyq jataqhana, 100 kelýshige arnalǵan qonaqúı, kitaphana, ashana, májilis pen sport zaldary – barlyǵy túkke jaramsyz bolyp qaldy. 2014 jyly shatyrdyń jartysy ushyp ketip, tóbesi opyrylyp tústi. 2015 jyly mınıstrlik áýelde durys josparlanbaǵan «saqaldy» qurylysty ákimdiktiń qaramaǵyna ótkizbek boldy. Biraq sol tusta Pavlodar oblysyn basqarǵan Qanat Bozymbaev jergilikti bıýdjette ǵımaratty qalpyna keltirer qarjy joq ekenin alǵa tartyp, balansqa qabyldaýdan bas tartty. 2016 jyly birneshe aı boıy jalaqy almaǵan kúzetshilerdiń tózimi taýsylyp, jumystan ketken.
Sodan soń oqý korpýstary esik, terezelersiz, tipti santehnıkalyq jabdyqtarsyz qaldy. 2017 jyly Bilim jáne ǵylym mınıstrligi «bul joba kóp qarjyny qajet etedi, onyń keregi joq» degen málimdeme jasap, bálen jyl boıy bos turǵan ǵımaratty áıteýir ákimdikke ótkizip tyndy. Bıýdjetten taǵy 4 mlrd teńge bólinip, drenajdyq júıe salynyp, korpýstar qalpyna keltirilip, 2019 jyldyń jeltosqan aıynda saltanatty túrde ashyldy. Sol kezde oblys ákimi Bolat Baqaýov bul ortalyq ERG kompanııasynyń senimdi basqarýyna berilip, oǵan qarasty kásiporyndardyń mamandaryn daıyndaıtynyn aıtqan edi. Biraq bul jospar da júzege aspaıdy. Áıteýir ótken jyldyń kókteminde bir kádege jarady.
Ekibastuz qalasynda koronavırýstyq ınfeksııaǵa shaldyqqandar qatary kúrt kóbeıgen tusta munda provızorlyq ortalyq uıymdastyryldy. Qazir taǵy da bos tur. Oblystyq bilim berý basqarmasynyń ókilderi qajet bolǵan jaǵdaıda oqý ortalyǵynyń emdeý ornyna aınalatynyn aıtty. Sondaı-aq, ony Toraıǵyrov ýnıversıtetiniń senimdi basqarýyna berý máselesi qarastyrylyp jatqan kórinedi.