Almaty qalasynda tehnıka jóndeý ortalyǵy órtenip, 20 avtokólik tolyǵymen janyp ketti. Oqıǵa kýáleri men tótenshelikter qyzyl jalyn bastalǵan kezde tek 15 mashınany syrtqa shyǵaryp úlgergen. Olardyń ıeleri endi qaıda shaǵymdanaryn bilmeı ári-sári bolýda, dep habarlaıdy Egemen.kz Almaty telearnasyna silteme jasap.
10 jyl boıy jumys itep kelgen bul tehnıkalyq jóndeý ortalyǵyna adamdar senimmen kóligin qaldyryp kelgen. Alaıda búgin olar jóndelgen kólikteriniń ornyna, órtengen temir bólshekterdi alyp ketemiz dep esh oılamaǵan.
Alapat órt jaıly habarlama tótenshe jaǵdaı departamentiniń kezekshi pýltine keshki 22.00 shamasynda kelip túsken. Oqıǵa ornyna dereý jetken tótenshelikter jalpy aýmaǵy 1300 sharshy metrdi quraıtyn nysannyń 600 sharshy metrin sóndirip úlgergen. Sonymen qatar, 4 gaz-balon men 15 avtokólikti qyzyl jalynnyń ishinen alyp shyqqan. Abyroı bolǵanda, jaqyn ornalasqan janarmaı quıý beketine jalyn jetpegen.
«Jalpy órt sóndirý jumystaryna 40 astam adam jeke quram jáne 15 birlik tehnıka jumyldyryldy. Abyroı bolǵanda, zardap shekkender, mert bolǵandar joq», dedi qalalyq TJD resmı ókili Gúldana Nurymbetova.
Kóligin jóndetýge qaldyryp, jaıaý qalǵan Ravshan Hamraev bundaı sumdyqtyń bolary úsh uıyqtasa túsine kirmegenin aıtady. Tehnıkalyq jóndeý ortalyǵy oǵan kóligin 4 kún buryn jóndeýden ótkizip, tabystaý kerek bolǵan. Alaıda temir tulpardyń ornyna órtengen qaldyǵyn ǵana alǵan ol, ne isterin bilmeı dal.
«Búgin tańerteń osynda kezdeısoq kelip, myna sumdyqty kórdim. Kóligim kúl-talqan bolyp janyp ketti. Kólik jóndeý ortalyǵynyń ıesine habarlassam, tutqany kótermeıdi. Bul kólik jalǵyz tabys kózimiz edi. Onyń ústine áli nesıesin tólep bitpedim. Taksı bolyp jumys istedim. Endi mine ne isterimdi, kimnen surarymdy bilmeımin», dedi jábirlenýshi Ravshan Hamraev.
Al órtengen ortalyq basshylary qasaqana órt qoıylýy múmkin deıdi. Aıtýynsha, jaramsyz bolyp qalǵan kólik ıelerine shyǵyndy kim óteıtinin tek saraptamadan keıin ǵana aıta alady.
«Kúzetshi jalyn bastalysymen birden órt sóndirýshilerge habarlasty. Qasaqan órteý bolýy múmkin. Eshkim bilmeıdi. Barlyǵyn saraptama nátıjesi kórsetedi. О́rtengen kólik ıelerine de shyǵyndy kim óteıtini de sodan keıin belgili bolady», dedi órtengen TJO ákimshisi Gennadıı Fıllıpov.
Qazir tıisti saraptama taǵaıyndalyp, órttiń neden týyndaǵany anyqtalyp jatyr.