«Oppozısıonnaıa platforma — Za jızn» partııasy Ýkraına prezıdenti Vladımır Zelenskııge ımpıchment jarııalaý rásimin bastaıdy, dep habarlaıdy Egemen.kz Ria.ru aqparattyq portalyna silteme jasap.
Bul týraly Joǵarǵy Radada depýtat Vadım Rabınovıch málimdedi. Munyń sebebi – memleket basshysynyń oppozısııalyq telearnalarǵa qarsy sanksııa engizýi. Onyń aıtýynsha, Vladımır Zelenskıı «saılaýshylar men eldi mazaq etti».
Bir kún buryn Ýkraına prezıdenti birqatar telearnaǵa jáne olardyń ıesine qarsy sanksııa engizdi. Bul sharalar aktıvterdi buǵattaýdy, saýda operasııalaryn shekteýdi, kapıtaldy shetelge shyǵarýǵa jol bermeýdi, lısenzııalardyń kúshin joıýdy, sondaı-aq Ýkraınanyń radıojıilik resýrsyn paıdalanýǵa tyıym salýdy jáne telebaǵdarlamalardy taratýdy kózdeıdi.
Qazirgi tańda úsh telearna («112 Ýkraına», ZIK jáne NewsOne) habar taratýdy toqtatqan. Olar Zelenskııdiń sheshimin «BAQ-ty saıası qýdalaý» dep sanap otyr. Al fraksııanyń taǵy bir tóraǵasy Iýrıı Boıko bıliktiń bul áreketin konstıtýsııany tikeleı buzý jáne Ýkraınada jeke dıktatýrany ornatýǵa jol dep atap otyr.
Aıtolqyn MYRZAKARIM