Memleket basshysy Qasym-Jomart Toqaev Ishki ister mınıstri Erlan Turǵymbaevty qabyldady, dep habarlaıdy Egemen.kz
Prezıdentke Ishki ister mınıstrliginiń 2020 jyly atqarǵan jumystarynyń nátıjeleri men krımınogendik ahýaldyń jaı-kúıi týraly aqparat berildi. Mınıstrdiń aıtýynsha, elimizdegi qylmys kórsetkishi 37 paıyzǵa tómendegen, sondaı-aq urlyq, qaraqshylyq, tonaý, buzaqylyq jáne zorlaý túrindegi qylmystardyń da sany azaıǵan. Kóshelerde jáne basqa da qoǵamdyq oryndarda qaýipsizdik deńgeıi artqan. Jol-kólik oqıǵalarynyń jáne sonyń saldarynan jaraqattanǵan, qaza bolǵan adamdardyń sany qysqarǵan.
Qasym-Jomart Toqaev bul baǵyttaǵy jumystardy turaqty baqylaýda ustaý qajettigin atap ótti.
Sonymen qatar Prezıdentke buryn berilgen tapsyrmalardyń oryndalý nátıjeleri týraly esep berildi.
Erlan Turǵymbaev Ishki ister mınıstrligi júıesinde 2021 jyldyń «Quqyq buzýshylyqtyń aldyn alý jyly» dep jarııalanǵanyn aıtyp, ishki ister organdaryn reformalaý jónindegi jobalardyń júzege asyrylýyna egjeı-tegjeıli toqtaldy. Atap aıtqanda jumystyń servıstik modelin engizý, «jurtqa jaqyn polısııa» qaǵıdatyn qamtamasyz etý, ýchaskelik ınspektorlar qyzmetin reformalaý jóninde sóz boldy.
Memleket basshysyna ishki ister organdarynyń qyzmetin sıfrlandyrýǵa qatysty jobalar, azamattarǵa polısııamen jedel baılanys ornatýǵa múmkindik beretin «Police 102» mobıldik qosymshasyn iske qosýdyń alǵashqy nátıjeleri týraly baıandaldy.
Prezıdent azamattardyń polısııaǵa degen senimin arttyrýda aıtarlyqtaı jetistikke qol jetkizýge múmkindik beretin sapaly reforma júrgizý qajettigine basa mán berdi.
Osy rette Ishki ister mınıstri kadrlardy irikteý júıesiniń jetildirilip jatqany, jańa biliktilik talaptarynyń bekitilgeni, sybaılas jemqorlyqqa qarsy ımmýnıtettiń qalyptasýy, ıdeologııalyq jáne ımıdjdik jumystardyń kúsheıtilgeni jaıynda málimet berdi.
Budan bólek Prezıdentke qylmystyq-atqarý júıesin jańǵyrtý, jazasyn óteýshilerdiń jaǵdaıyn jaqsartý jáne olardy jumyspen qamtý, sondaı-aq, kolonııalarda jappaı beınebaqylaý qurylǵylaryn ornatý boıynsha qabyldanyp jatqan sharalar týraly baıandaldy.
Mınıstr eńbekaqyny kóbeıtýge jáne áleýmettik jaǵdaıdy jaqsartýǵa qatysty memlekettik qoldaý sharalary úshin Prezıdentke qyzmetkerlerdiń alǵysyn jetkizdi.
Kezdesý qorytyndysy boıynsha Memleket basshysy elimizdegi quqyqtyq tártip deńgeıin odan ári arttyrýǵa, azamattardyń polısııaǵa degen senimin nyǵaıtýǵa jáne qazirgi zamanǵy syn-qaterler men qaýipterge qarsy turýdyń tıimdiligin qamtamasyz etýge baǵyttalǵan birqatar tapsyrma berdi. Sondaı-aq Qasym-Jomart Toqaev memlekettik qyzmet kórsetý isin sıfrlandyrý jumystaryn jalǵastyrý mańyzdy dep sanaıtynyn aıtty.