Petropavl qalasynda ıývenaldyq polıseıler túngi saǵat birler shamasynda Nazarbaev jáne Músirepov kósheleriniń qıylysynda kóshe kezip júrgen bir top kámeletke tolmaǵan jasóspirimderdi ustady, dep habarlaıdy Egemen.kz
Tekserý barysynda jastardyń báriniń kámelet jasyna tolmaǵandyǵy belgili boldy. О́tken jazda dál osy qylyǵy úshin olar ınspektorlardyń kózine túsip úlgergen. Osy joly da ata-analary shaqyrtylyp, Ákimshilik kodekstiń 442-baby boıynsha hattama toltyrylyp, jasóspirimniń anasymen profılaktıkalyq sıpattaǵy áńgimelesý júrgizildi.
SQO PD bastyǵynyń birinshi orynbasary, polısııa polkovnıgi Qanat Aıtbaevtyń aıtýynsha, jyl basynan ıývenaldyq polıseıler oblys boıynsha 60-tan astam reıdtik is-sharalar ótkizgen. Qańtar aıynda polısııaǵa kámeletke tolmaǵan 319 jasóspirim jetkizilipti. Onyń ishinde kámeletke tolmaǵandardyń túngi ýaqytta úı-jaıdan tys júrgeni úshin 210 zańdy ókil jaýapkershilikke tartyldy. Túrli quqyq buzýshylyqtar úshin óńir aýmaǵynda 8 jasóspirim esepke qoıylypty. Búgingi tańda polısııanyń esebinde 190 jasóspirim tur eken. Olardyń árqaısysymen polıseıler men ustazdar jekeleı jumystar júrgizedi.
PETROPAVL