Qazaq ulttyq qyzdar pedagogıkalyq ýnıversıtetinde «Qazaqstanda zamanaýı bilim berýdi damytýdyń problemalary men perspektıvalary» taqyrybynda halyqaralyq ǵylymı-praktıkalyq konferensııa ótedi, dep habarlaıdy oqý ornynyń baspasóz qyzmeti.
Alqaly jıyn otandyq pedagogıka ǵylymynyń damýyna irgeli úles qosqan kórnekti ǵalym, ulaǵatty ustaz, elimizdiń joǵary bilim berý salasynda óz qoltańbasyn qalyptastyrǵan qaıratker Kúlásh Qunantaevanyń 90 jyldyq mereıtoıyna oraı uıymdastyrylyp otyr.
Pedagogıka jáne psıhologııa joǵary mektebi muryndyq bolyp otyrǵan sharaǵa qazaqstandyq jáne sheteldik ǵalymdar men pedagogıkalyq joǵary oqý oryndarynyń oqytýshylary men izdenýshileri qatyspaq.
Zamanaýı bilim berý keńistigindegi pedagogıkalyq ıdeıalardy taldaý jáne júıeleý maqsatynda konferensııa jumysy 5 baǵyt boıynsha júrgizilmek. Atap aıtqanda, qatysýshylar «Zamanaýı oqytý men tárbıe berýdiń teorııalyq jáne ádisnamalyq máseleleri», «Bilim berý, pedagogıka jáne psıhologııa máseleleri: ǵylym men tájirıbeniń ıntegrasııasy», «Bilim berýdegi zamanaýı trendter», «Jahandaný jaǵdaıynda bilim berý júıesin basqarý» jáne «Kópdeńgeıli pedagog mamandardy daıarlaýdyń júıesin jetildirý» seksııalary boıynsha ózara tájirıbe almaspaq.
Aıta keteıik, Kúlásh Qunantaeva – pedagogıka ǵylymdarynyń doktory, professor Qazaqstan Respýblıkasynyń Ulttyq ǵylym akademııasynyń jáne QR Pedagogıka ǵylym akademııasynyń Qurmetti akademıgi, Reseı bilim berý akademııasynyń sheteldik múshesi, Grýzııa bilim berý ǵylymdary akademııasynyń akademıgi, Qazaqstannyń eńbek sińirgen qaıratkeri, Qazaqstan Bilim berý isiniń qurmetti qyzmetkeri.
Onyń áıelder biliminiń damýy jáne Qazaqstanda bilim berýdi damytý týraly 400-den asa ǵylymı eńbegi jaryq kórdi. Onyń ishindegi oqý quraldary men oqýlyqtar jáne monografııalar bar. Kúlásh Qunantaevanyń jetekshiligimen 24 ǵylym kandıdaty men doktory daıyndaldy. Qazirgi kúnde de «Qunantaevanyń ǵylymı mektebi» sabaqtastyǵy saqtalǵan.
Kúlásh Qunantaeva ǵylymı-pedagogıkalyq qyzmeti, ǵylym men bilimdi damytýdaǵy jáne kadr daıarlaýdaǵy eren eńbegi úshin kóptegen memlekettik nagradalarmen marapattaldy.