Balalar hırýrgııasy eresekterdi emdeıtin medısınadan áldeqaıda kúrdeli ári jaýapkershiligi de eki ese joǵary ekendigi aıan. Dúnıege shyr etip kelgen náreste qansha jerden shyrqyrsa da, óziniń janyna ne batyp turǵanyn aıta almaıdy. Jáne eresekterdegi hırýrgııanyń aralasýyn qajet etetin kóptegen kesel balalarda kezdespeıdi nemese óte sırek. Oǵan qosa sábı aǵzalarynyń kólemi áli tym kishkentaı, qabyrǵalarynyń juqa, názik bolýy, tolyq jetilmeýi kez kelgen operasııany kúrdelendire túsetindikten, operasııa tehnıkasynyń óte joǵary, asa dáldiligin talap etedi.
Balanyń jasy kishkentaı bolǵan saıyn otaǵa daıyndyq, odan keıingi kútim de asa muqııattylyqty qajet etpek. Máselen, medısınada naýqas pen dárigerdi baılanystyratyn deontologııa qaǵıdasy bar. Jańa týǵan náreste, zańdyq turǵyda, aqyl-esi áli damymaǵandyqtan taǵdyrsheshti deldaldyqty ata-ana atqarýǵa májbúr bolsa, balanyń ómiri úshin jaýapkershilikti dáriger moınyna alady. Al jańa ǵana dúnıege kelgen sábılerde hırýrgtardyń shuǵyl áreket etýin qajet etetin týabitti keselder tabylyp jatady. Máselen, bular – óńesh atrezııasy, týabitti ishek ótimsizdiginiń túrleri, anýs atrezııasy, kindik baýynyń embrıonaldyq jaryqtary syndy san túrli dertter.
Osyǵan oraı, Almatydaǵy Balalarǵa shuǵyl medısınalyq kómek kórsetý ortalyǵynda «Jańa týǵan náresteler, balalar men jasóspirimder endohırýrgııasy» taqyrybynda halyqaralyq semınar-sheberlik dáristeri ótti. Bir jaǵynan Balalar shuǵyl medısınalyq járdem ortalyǵyndaǵy bul shara professor Almas Kamaluly Ormantaevty eske alýǵa arnalyp, «Onyń oılary men tilekterin oryndaý» taqyrybyn alǵa shyǵardy. «Jańa týǵan náresteler, balalar men jasóspirimder endohırýrgııasy. Indosıanındi jasyl ICG jáne RUBINA 4K/3D beıne júıesiniń asqazan-ishek joldary men anastomozdar hırýrgııasynyń múmkindikteri» máselelerine qurylǵan semınarǵa Irkýtsk memlekettik medısına ýnıversıtetiniń balalar hırýrgııasy kafedrasynyń meńgerýshisi, professor Iýrıı Kozlov, Qazaqstan endoskopııalyq hırýrgtar qaýymdastyǵynyń prezıdenti, professor Vladımır Kotlobovskıı de qatysty.
Halyqaralyq is-sharada Balalar shuǵyl medısınalyq járdem ortalyǵynyń bas dárigeri, «S.Asfendııarov atyndaǵy Qazaq ulttyq medısınalyq ýnıversıteti» KeAQ balalar hırýrgııasy kafedrasynyń meńgerýshisi, medısına ǵylymdarynyń kandıdaty Abaı Qusaıynov sóz alyp, elimizdegi balalar hırýrgııasynyń máselelerin qozǵady.
Halyqaralyq master-klass sheńberinde asqazan-ishek reflıýks aýrýy, gıdronefroz, týa bitken megaýretr sııaqty asqazan-ishek joldarynyń, nesepaǵar-jynys júıesiniń týa bitken jáne júre paıda bolǵan aqaýlary bar balalarǵa laparoskopııalyq operasııalar jasaldy. Hırýrgter KarlStorz/kompanııasynyń sońǵy endovıdeohırýrgııalyq jabdyqtaryn qoldana otyryp, 4 hırýrgııalyq operasııany sátimen júzege asyrdy.
Jumys kúniniń sońynda dóńgelek ústel ótkizilip, kúrdeli operasııalar men klınıkalyq jaǵdaılar talqylandy. Konferensııa moderatorlary áriptesteriniń kásibı suraqtaryna jaýap berdi. Semınar sońyna qaraı professor Iý.A.Kozlov «Sibirden súıispenshilikpen: jańa týylǵan náresteler men sábılerge zaqymy az hırýrgııa» atty beıne-dáristerin usyndy.
ALMATY