Bilim jáne ǵylym salalaryndaǵy basty trendter ne? Atalǵan salalardyń zamanaýı baǵyttary qandaı? Osy jáne ózge de saýaldarǵa jaýap izdeý maqsatynda Qazaq ulttyq qyzdar pedagogıkalyq ýnıversıtetinde halyqaralyq jıyn ótedi. Bul týraly oqý ornynyń baspasóz qyzmeti habarlady.
Onlaın rejimde uıymdastyrylatyn basqosýdyń maqsaty – zamanaýı jaǵdaıdaǵy ǵylym men bilim berýdi damytýdyń baǵyttary men jahandyq máselelerdi ǵylymı-praktıkalyq turǵyda negizdeý.
Otandyq jáne sheteldik ǵalymdardyń qatysýymen ótetin konferensııa jumysy 5 baǵytta uıymdastyrylmaq. Atap aıtqanda, jıyn qatysýshylary «Dene shynyqtyrý jáne sport salasynyń ózekti máseleleri jáne bolashaǵy», «Qazirgi jaǵdaıda mektepke deıingi jáne bastaýysh bilim men tárbıe berýdiń sabaqtastyq máseleleri», «Praktıkalyq psıhologııadaǵy zamanaýı ádister men ınnovasııalar» jáne «Arnaıy bilim berý júıesiniń ózekti máseleleri: ınnovasııalyq tendensııalar» seksııalary boıynsha ózara pikir almasyp, paıymdy oılaryn ortaǵa salmaq.
– Aıta keteıik, bıylǵy jyldyń 23 sáýirinde ótetin «Ǵylym men bilim salasyndaǵy zamanaýı trendter» atty halyqaralyq ǵylymı-praktıkalyq konferensııa Qyzdar ýnıversıtetiniń Pedagogıka jáne psıhologııa joǵary mektebi, Ýkraına pedagogıkalyq ǵylymdar ulttyq akademııasynyń Pedagogıka, Psıhologııa ınstıtýttarynyń muryndyq bolýymen uıymdastyrylyp otyr, – dep atap ótti Qyzdar ýnıversıtetiniń Baspasóz jáne qoǵammen baılanys bóliminiń basshysy Jandar Asan.
Konferensııaǵa kelip túsken materıaldar negizinde arnaıy jınaq jaryq kóredi.