Búgin QR Ekologııa, geologııa jáne tabıǵı resýrstar mınıstrliginiń keńeıtilgen alqa otyrysynda vıse-mınıstr Erlan Nysanbaev orman sharýashylyǵy salasyndaǵy 2020 jylǵy jumys qorytyndysyn baıandady.
Onyń aıtýynsha, Qazaqstanda 2019 jylmen salystyrǵanda ormanmen qamtylǵan alqap 188 myń gektarǵa ulǵaıdy.
«Memleket basshysynyń orman qorynda 5 jyl ishinde 2 mlrd. aǵash otyrǵyzý jónindegi tapsyrmasyn oryndaý aıasynda oblys ákimdikterimen birlesip óńirler boıynsha Ormandardy molyqtyrý men orman ósirý jónindegi keshendi josparlar ázirlenip, bekitildi. Orman otyrǵyzýdyń eń kóp kólemi Túrkistan, Qyzylorda jáne Jambyl oblystarynda, sondaı - aq Semeı men Ertis ormany orman rezervattarynyń aýmaǵynda boljanyp otyr»,-dedi óz sózinde vıse-mınıstr.
Ol mınıstrliktiń orman sharýashylyǵy jáne janýarlar dúnıesi komıtetiniń tabıǵat qorǵaý mekemeleriniń jáne oblys ákimdikteriniń orman qorǵaý mekemeleriniń kúshimen 5 jyl ishinde 843 myń ga alańda 1,7 mlrd. aǵash otyrǵyzylatynyn atap ótti. Kórsetilgen sharalar 2030 jylǵa qaraı eldiń ormandylyǵyn 5% - ǵa deıin jetkizýge múmkindik beredi.
«Memlekettik orman qory aýmaǵynda orman órtteriniń 701 jaǵdaıy tirkeldi, olardyń aýdany 41,8 myń ga qurady, respýblıka boıynsha jalpy zalal - 2,1 mlrd.teńge», - dep málimdedi Erlan Nysanbaev.
Orman órtteriniń eń kóp aýdandary Jambyl, Shyǵys Qazaqstan, Batys Qazaqstan, Pavlodar jáne Túrkistan oblystarynda, sondaı-aq «Semeı ormany» rezervatynyń aýmaǵynda tirkelgen.
Vıse-mınıstr ótken jyly zańsyz aǵash kesý sany 25% - ǵa tómendegenin, alaıda zańsyz kesilgen aǵash kóleminiń ósýi tirkelgenin habarlady.
«Aǵashtardy zańsyz kesý, joıý jáne búldirý jaýapkershiligin arttyrý maqsatynda qoldanystaǵy zańnamaǵa aıyppuldardy ulǵaıtý jáne buzýshylarǵa sanksııalardy qatańdatý bóliginde ózgerister men tolyqtyrýlar engizildi», - dep tolyqtyrdy Mınıstrdiń orynbasary.
2020 jyldyń qorytyndylarynyń qatarynda «ósimdikter álemi týraly» zań jobasyn ázirleý de bar.
Sonymen qatar, vıse-mınıstr ulttyq parkterde ekologııalyq týrızmdi damytýǵa kóp kóńil bólingenin atap ótti.
«Almaty tobyndaǵy Ile - Alataý, Kólsaı-kólderi, Sharyn, Altyn Emel sııaqty tórt memlekettik ulttyq tabıǵı parkterdiń tujyrymdamasy qabyldandy. Osy ulttyq parkterdiń janynan Qoǵamdyq keńester quryldy. 2020 jyly Ile-Alataý ulttyq parkinde jobany júzege asyrýǵa 900 mln.teńge ınvestısııalandy», - dedi Erlan Nysanbaev.
Osy jumystar sheńberinde 2025 jylǵa qaraı ulttyq parkterdiń Almaty tobyna jeke ınvestısııalardyń kólemi 31 mlrd.teńgeni quraıdy, ulttyq parkterdiń rekreasııalyq júkteme normalaryn eskere otyryp, týrısterdiń kútiletin aǵyny 2 mln. adamnan asady dep kútilýde.
Orman sharýashylyǵyn, erekshe qorǵalatyn tabıǵı aýmaqtardy damytýǵa jáne bıoártúrlilikti saqtaýǵa baǵyttalǵan «Jasyl Qazaqstan» ulttyq jobasyn ázirleý josparda bar.