Búgin Májilistiń jalpy otyrysynda «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýsııalyq zańyna ózgerister men tolyqtyrýlar engizý týraly» QR Konstıtýsııalyq zań jobasy birinshi oqylymda maquldandy, dep habarlaıdy Egemen.kz
Qujatty Qazaqstan Respýblıkasy Parlamenti depýtattary ázirlep, zań shyǵarý bastamasy tártibimen engizdi. Ákimshilik rásimdik-prosestik kodeksti qabyldaý jáne ony 2021 jylǵy 1 shildeden bastap qoldanysqa engizý sot júıesiniń jumysyna túzetýler engizýdi talap etedi.
«Qazaqstan Respýblıkasy Joǵarǵy sotynyń jáne oblystyq sottardyń «Qazaqstan Respýblıkasynyń sot júıesi men sýdıalarynyń mártebesi týraly» Konstıtýsııalyq zańda belgilengen qoldanystaǵy qurylymy Ákimshilik rásimdik-prosestik kodekstiń mindetterine tolyq kólemde jaýap bermeıdi. Zań jobasynyń túzetýleri eki bloktan turady», dedi Májilis depýtaty Qanat Mýsın.
Birinshiden, Joǵarǵy sotta ákimshilik ister boıynsha sot alqasyn qurý usynylady. Qazirgi mamandandyrylǵan sot alqasy taratylatyn bolady. Oblystyq sottarda da tıisti sot alqalary qurylady. Bul shara sot júıesine óńirlerde isterdiń bólinýine baılanysty únemi ózgerip otyratyn jaǵdaıǵa jedel den qoıýǵa múmkindik beredi.
«Zań jobasynda Memleket basshysy taǵaıyndaýǵa usynatyn Joǵarǵy sot Tóraǵasy jáne Joǵarǵy sot sýdıalary laýazymyna kandıdattarǵa qoıylatyn talaptarǵa qatysty ózgerister engiziledi. Bul túzetýler eldiń Joǵarǵy sot organyna quqyqtyń mamandandyrylǵan salalarynda, mysaly, salyq quqyǵynda nemese jer qoınaýyn paıdalaný quqyǵynda kóp tájirıbesi bar kórnekti zańgerlerdi tartýǵa baǵyttalǵan. Bul neǵurlym daýly ister boıynsha sot tóreliginiń sapasyn qamtamasyz etýge múmkindik beredi jáne búkil sot júıesine oń áserin tıgizedi. Bul túzetýler Memleket basshysy usynǵan kandıdattarǵa ǵana qatysty ekenin erekshe atap ótken jón. Olar basqa sýdıalarǵa qatysty bolmaıdy», dedi depýtat.
Engiziletin normalar ákimshilik ádiletti engizýdiń bastapqy kezeńinde júktemeni teń bólýge, sondaı-aq ákimshilik quqyq buzýshylyqtar men jarııa daýlar týraly isterdi qaraý jónindegi sot praktıkasynyń ara-jigin ajyratýǵa múmkindik beredi.