Jambyl oblysynda uıtqyp soqqan daýyldy jeldiń saldarynan birqatar nysandarǵa zaqym keldi. Taraz qalasy boıynsha Abaı, Jambyl dańǵyldary men Qazybek bı, Q.Sátbaev, Kósheneı kóshelerindegi jáne 15-yqshamaýdandaǵy 10 kópqabatty turǵyn úıdiń 1405 sharshy metr shatyry zaqymdalǵan. Qalalyq ákimdiktiń málimetinshe, shatyrlardy qalpyna keltirý jumystary merdigerler tarapynan jedel iske asyrylatyn bolady. Sondaı-aq, 15-yqshamaýdany №14 úıdiń 20 sharshy metr balkony jáne 3 metr gaz qubyryna zalal kelgen, dep habarlaıdy Egemen.kz.
Sonymen qatar, Baızaq batyr, Asqarov, Gersen kóshelerindegi 3 elektr baǵanasy qulaǵan. Biraq, qulaǵan baǵanalardy «Taraz Jaryq» jaýapkershiligi shekteýli seriktestiginiń 3 brıgadasy qalpyna keltirgen. Sol sııaqty, Baızaq batyr, A.Asqarov, A.Pýshkın, ál-Farabı kóshelerinde 6 jerden elektr jelileri úzilgen. Ol da «Taraz qalalyq elektr júıeleri» mekemesi tarapynan jóndelgen. Sondaı-aq, elektr jaryǵynyń óshýine baılanysty, dıspetcherlik qyzmetke 5 ótinish túsip, bul jumystar jedel brıgadalar tarapynan iske qosylǵan.
Daýyldy jeldiń saldarynan Taraz qalasyndaǵy kóshelerde 40-qa jýyq tal qulap, olardy tazalaý jumystaryna «Jasyl El-Taraz» jaýapkershiligi shekteýli seriktestigi tarapynan 4 brıgada jáne 13 tehnıka tartyldy. Nátıjesinde, qulaǵan 20 aǵash kesilip, shyǵarylǵan. Sonymen qatar, qala kóshelerindegi 20 baǵdarsham isten shyqqan. Ony qalpyna keltirý jumystaryna «SMEÝ-Avtotranssıgnal-2» jaýapkershiligi shekteýli seriktestigi tarapynan 4 brıgada uıymdastyrylǵan. Al, Y.Súleımenov kóshesiniń boıy men «Pobeda» turǵyn alqabynda eki aıaldama qulaǵan. Qazirgi tańda olardy qalpyna keltirý jumystary júrgizilýde. Qala boıynsha 42 bılbord, 5 pılonnyń banneri, Tuńǵysh Prezıdent saıabaǵyndaǵy Tý jyrtylǵan. Bul bannerlerdi alyp tastaý jumystarymen jarnama agenttikteri aınalysýda. Al, qaladaǵy jylý berýshi jáne tasymaldaýshy kommýnaldyq kásiporyndarǵa eshqandaı ótinish túspegen.