Nur-Sultan qalasynyń Polısııa departamenti jergilikti polısııa qyzmeti basqarmasy bóliminiń basshysy Azamat Sadyqov onlaın brıfıngte karantındik sharalardyń saqtalýyn anyqtaý maqsatynda 540 reıd júrgizilgenin málim etti. Bul týraly Egemen.kz qala ákimdiginiń resmı saıtyna silteme jasap habarlaıdy.
«Qala aýmaǵynda karantın sharalarynyń jalǵasýyna baılanysty Polısııa departamenti shaǵyn jáne orta bıznes obektileriniń, sondaı-aq elorda turǵyndary men qonaqtarynyń karantın rejımin saqtaýyna qatysty aldyn-alý jumystaryn júrgizýde. Epıdemıologııalyq talaptardy buzatyn obektiler – kóńil kóterý oryndaryna, dámhanalar men meıramhanalarǵa, karaokeler men barlarǵa jáne saýda ortalyqtaryna erekshe nazar aýdarylady», deıdi Azamat Sadyqov.
Ol óz sózinde ýchaskelik polısııa ınspektorlarynan, SES-tiń, aýdandyq ákimdikterdiń ókilderi men eriktilerden quralǵan mobıldi toptar reıdtik is-sharalar júrgizip, karantın rejımin buzýshylardy anyqtap jatqanyn aıtyp ótti.
Osy jyldyń basynan beri mobıldi toptar 540 reıd júrgizip, 340 karantın rejımin buzý faktisin anyqtady:
- túngi klýbtarda, dámhanalarda, meıramhanalarda, kompıýterlik klýbtarda – 278;
- shashtarazdarda, massaj salondarynda, saýnalar men sulýlyq salondarynda – 17;
- dúkenderde, saýda ortalyqtarynda, bazarlarda – 35.
«Sanıtarııalyq-epıdemıologııalyq baqylaý departamenti MAÁS-qa 40-tan astam mekemege qatysty 50-den asa materıal (ÁQBtK-niń 462-baby) joldaǵan, materıaldar qaralý satysynda. MAÁS sheshimimen 20-dan astam mekeme ákimshilik jaýapkershilikke tartylyp (ÁQBtK-niń 462-baby), qyzmeti toqtatyldy. Karantın rejımin buzý faktilerin anyqtaý boıynsha jumystar jalǵasýda jáne turǵyndarmen karantın rejımin saqtaýǵa qatysty túsindirý jumystary júrgizilýde», dep vedomstvo ókili sózin aıaqtady.