Almaty garnızonynyń áskerı bólimderinde jaýyngerlik kezekshiliktiń ahýalyna, áýe shabýylyna qarsy qorǵanys júıelerin óristetýge, avıasııalyq toptardyń ázirligine, áskerler qyzmetine, jaýyngerlik daıarlyq pen materıaldyq-tehnıkalyq qamtamasyz etýge erekshe nazar aýdaryldy.
Osyǵan baılanysty áskerı bólimder jaýyngerlik oqý-jattyǵý mindetterdi oryndaı otyryp, jaýyngerlik daıarlyqtyń joǵary deńgeıine keltirildi. Sonymen qatar, barlyq tekseriletin bólimshelermen baqylaý sabaqtary ótkizildi.
Qaýyrt tekserý barysynda áýe shabýylyna qarsy qorǵanys áskerleriniń bólimsheleri qarsylastyń áýe maqsattaryn anyqtaý jáne shartty túrde joıý jónindegi is-qımyldardy, al avıasııa bazasynyń ınjenerlik-tehnıkalyq quramy men qamtamasyz etý kúshteri avıasııa tehnıkasyn jaýyngerlik oqý-jattyǵý ushýlaryna daıyndaý jónindegi is-sharalardy pysyqtady. Ushý quramy ushý daǵdylaryn, nysandy dáldeý eptiligin jáne shartty qarsylasty joıýdy, sondaı-aq jaýyngerlik ushýdy oryndaýdy baǵalady.
- Atalǵan tekserý Almaty garnızonynyń Áýe qorǵanysy kúshteri áskerı bólimderiniń jeke quramy eldiń áýe shebin kúzetýdegi júktelgen mindetterdi oryndaýǵa daıyn ekenin kórsetti. Bul jeke quramnyń jaýyngerlik daǵdysyn, áskerı bólimderdiń qoıylǵan mindetterdi qysqa merzimde oryndaýǵa daıyndyǵyn, sondaı-aq jaýyngerlik daıarlyq deńgeıi men bólimshelerdiń úılesimdigin jan-jaqty baǵalaý, - dedi avıasııa general-leıtenanty Nurlan Ormanbetov.
Kútpegen jerden tekserýdi QR QK Áýe qorǵanysy kúshteri Bas qolbasshysynyń komıssııasy júzege asyrdy.