Qostanaı oblysynyń turǵyndaryn tabıǵattyń tosyn qubylysy tańǵaldyrdy. Búgin tańerteń Naýyrzym óńirinde jergilikti turǵyndar kókjıekten 4 birdeı kúnniń sáýlesi túsip turǵanyn baıqaǵan, dep habarlaıdy Egemen.kz
Qystyń aıazdy kúnderi baıqalatyn bul qubylys pargelıı dep atalady. Pargelıı – kóne grek tilinde «jalǵan kún» degen uǵymdy bildiredi. Keıde áli kóterilip úlgermegen kúnniń shapaǵy kókjıekte kádimgi kúnniń kózi sııaqty bolyp kórinedi eken. Keıbir turǵyndar qystyń qatty aıazynda aspannan 5 birdeı «jalǵan kún» kórgenderin aıtady.
Munyń syry mynada eken: qysta atmosferadaǵy ylǵaldyń mıkrotamshylary qatty aıazdyń saldarynan muz krıstaldaryna aınalady. Mıllıondaǵan mıkrokrıstaldar aýa aǵysynyń áserinen ár jerge shoǵyrlanyp, shyǵyp kele jatqan nemese batyp bara jatqan kúnniń sáýlesine shaǵylysady. Al bizdiń kózimizge ol kádimgi kúnniń kózi sııaqty bolyp kórinedi eken.