Túrkistan oblysynda demalys kúnderi tolassyz jaýǵan jańbyrdyń sońy qalyń qarǵa ulasyp, oblystyq mańyzy bar joldar jabylǵan bolatyn.
Sozaq aýdany Qumkent eldi mekeniniń janynda, oblystyq mańyzy bar «Sozaq – Taraz» tasjolynyń 45 shaqyrymynda, «YUTONG» jolaýshylar tasymaldaıtyn avtobýs kóktaıǵaq saldarynan joldyń shetine shyǵyp ketken. Bul jaıly habarlama 101 kezekshilik pýltine kelip túsken. Oqıǵa ornyna jetken Túrkistan oblysy TJD 15 qyzmetkeri men tehnıkasy avtobýsty joldyń tazartylǵan bóligine alyp shyqty. Avtobýstaǵy 29 adam, onyń ishinde 1 bala qutqaryldy. Departament qyzmetkerleri qutqarylǵan adamdardy Sholaqqorǵan aýylyna jetkizý barysynda jolda Qumkent aýylynda qar qursaýynda qalyp qoıǵan 4 adamdy, onyń ishinde júkti áıeldi jáne balany qutqardy.
Oblystyq TJD málimetinshe, jeksenbi kúni qar qursaýynan qutqarylǵan 33 adam Sholaqqorǵan aýylyna jetkizilgen. Zardap shekkender men jaraqat alǵandar joq.