Aqtóbe qalasynyń sheneýnikteri kópbalaly anaǵa 2 mln teńgeniń sertıfıkatyn tabys etken, dep habarlaıdy Egemen.kz
Kópbalaly ana Aısulý Quzdybaeva bes balasyn aıadaı úıde ǵana tárbıelep otyr. Qalaǵa áıel taıaýda kelgen. Ol iri somadaǵy qaǵazdy alǵan kezde qýanyshynda shek bolmaǵan. Alaıda sertıfıkattyń eshqandaı quny bolmaı, jaı ǵana qaǵaz bolyp shyqqan. Amaly qalmaǵan Aısulý 5 balasymen birge jataqhananyń 14 sharshy metr jerin panalaýda.
Kópbalaly ana buǵan deıin jaǵdaıynyń nasharlyǵyn aıtyp, áleýmettik jeli arqyly kómek suraǵan. Oǵan eriktiler ún qatyp, úıine jóndeý júrgizip, teledıdardan bastap tóbege iletin shamyna deıingi kerek-jaraqtaryn alyp bergen. Endi sonyń bárine 2 mln teńgedeı qarajat jumsalypty-mys.
Belgili bolǵandaı Aısulý Quzdybaeva 1 naýryzda áıel Alǵys kúnine arnalǵan sharaǵa shaqyrylǵan. Aqtóbe oblysynyń ákimi kópbalaly anaǵa saltanatty sharada sertıfıkat tabystaǵan. Biraq otbasy aqshany qaıdan alaryn bilmegen.
«Oblys ákimi tapsyrdy. Eki mıllıonym bar dep, endi oǵan sál aqsha qosyp, basqa baspana satyp alǵym kelgen. Kórshilerim kelip quttyqtaǵan. Sóıtse, bul jaı ǵana qaǵaz bolyp shyqty», deıdi kóńili qalǵan ana.
Sheneýnikter bolsa áıelge bul sertıfıkattyń quny joǵyn eskertkenbiz dep otyr. Ol Qazaqstan halqy assambleıasynyń oblystyq fılıaly atynan kópbalaly anaǵan kórsetilgen kómekti kórsetý úshin tapsyrylǵan bolyp shyqty.
«Jastardan jóndeý jumysyna qansha aqsha shyǵardyńyzdar dep suradyq. Olardyń aıtýynsha, jóndeý júrgizip, jıhaz satyp alǵan, jalpy eki mıllıondaı shyǵarǵan. Kórsetilgen kómektiń somasyn kórsetý úshin Aısulýǵa osy sertıfıkatty tapsyrdyq. Buǵan aqsha bere me dep te suraǵan. Berilmeıtinin túsindirdik, bul somaǵa jóndeý jumystaryn júrgizilgenin aıtyp, osyny kórsetkimiz keldi», deıdi Qazaqstan halqy assambleıasy Aqtóbe oblystyq fılıaly hatshylyǵynyń jetekshisi Marjan Qorǵanbaeva.