Joldyń qanaǵattanarlyqsyz kúıi úshin Soltústik Qazaqstan oblysynda 60 laýazymdy tulǵa jaýapkershilikke tartyldy, dep habarlaıdy Egemen.kz Polisia.kz saıtyna silteme jasap.
Qysta joldyń jaǵdaıyna baqylaý jasaý – polısııanyń sýyq túse kezek kúttirmeıtin mindetteriniń biri. Soltústik Qazaqstan oblysynyń aýmaǵy arqyly ótetin halyqaralyq jáne respýblıkalyq mańyzy bar joldarǵa «Qazaqavtodor» JShS qyzmet kórsetedi, kún saıyn qar tazalaıtyn 60 tehnıka shyǵady.
Oblystyq jáne aýdandyq mańyzy bar joldardy kútip ustaý úshin «Petropavl Joldary» JShS-niń men úsh qosalqy merdiger uıymnyń 114 tehnıkasy qyzmet kórsetedi. Petropavldyń kóshe-jol jelisine 22 kommýnaldyq uıym qaraıdy. Bıylǵy qys jol qyzmetterin áýre-sarsańǵa saldy. Kún saıyn oblys ortalyǵynyń kóshelerin tazartýǵa 500-ge deıin tehnıka shyqty. Qalanyń kólik júretin joldaryn tazalap úlgerip turdy, endi kásiporyndar trotýarlardy tazartýǵa kóshti.
Jumys josparlary Soltústik Qazaqstan oblysy Ákimshilik polısııa basqarmasy jol jáne tehnıkalyq ınspeksııa bóliminiń qyzmetkerleri kúndelikti júrgizetin tekseris nátıjelerine sáıkes júrgiziledi.
Tekseris nátıjeleri boıynsha kemshilikterdi joıý jóninde uıǵarym joldanady. Mysalǵa, naýryz aıynyń basynda Qızatov kóshesiniń boıyndaǵy Omby aınalma joly men Borkı kentine deıingi aralyqta tereń dóńgelek izderi paıda bolǵany anyqtaldy. Qyzmet kórsetetin kásiporynǵa qatysty uıǵarym shyǵaryldy, kúsheıtilgen jumys nátıjesinde alty saǵattyń ishinde kemshilik joıyldy. Jyl basynan beri polıseıler múddeli uıymdarǵa 223 uıǵarym joldady. Joldar men jol qurylystaryn qanaǵattanarlyqsyz deńgeıde kútip-ustaǵany úshin 60 onyń ishinde uıǵarymdardy oryndamaǵan úsh laýazymdy tulǵa jaýapkershilikke tartyldy.