Qostanaılyq polıseıler iri kólemde esirtki saýdasymen aınalysyp kelgen qylmystyq topty ustady. Polısııa málimetinshe, kúdiktilerden jalpy salmaǵy 10 kılodan astam gashısh jáne marıhýana tárkilenip alynǵan.
Oblystyq PD esirtki qylmysyna qarsy kúres basqarmasy basshysynyń orynbasary Erbol Qarymsaqovtyń aıtýynsha, elimizdiń birneshe óńirinde bir mezgilde ótken jedel quryqtaý sharasyna 7 ustaý toby qatysqan.
«22 naýryzda esirtki qylmysyna qarsy kúres basqarmasynyń qyzmetkerleri Qostanaı, Jambyl oblystary men Nur-Sultan qalasynda esirtki tasymaldaýmen aınalysyp kelgen 8 adamnan qurylǵan qylmystyq topty ustady. Qazir kúdiktilerge qatysty QR QK 297-babynyń 4-bólimi boıynsha sotqa deıingi tergeý júrip jatyr», dedi E. Qarymsaqov.
Esirtki satýshylar polısııanyń kózine osydan 4 aı buryn túsken. Polısııa málimetinshe, qylmystyq topty Denısov aýdanynda turatyn 51 jastaǵy mal dárigeri uıymdastyrǵan. Onyń nusqaýymen Qostanaı oblysynyń taǵy bir turǵyny esirtki tasymaldaýmen aınalysyp kelgen. Esirtkini Shý aýdanynyń 67 jastaǵy turǵyny jóneltip otyrǵan. Munyń syrtynda, esirtki taratatyn taǵy bir top jumys istegen. Tárkilengen esirtki zattarynyń jasyryn saýda naryǵyndaǵy baǵasy shamamen 14 mln teńge bolady.
Qostanaı oblysy