Qazaqstanǵa Sharm-el-Sheıh pen Dýbaıdan áýe reısimen kelgen 8 adamnan koronavırýstyń «brıtandyq shtamy» tabyldy, dep habarlaıdy Egemen.kz Sanıtarlyq-epıdemıologııalyq baqylaý komıteti Ulttyq saraptama ortalyǵynyń baspasóz qyzmetine silteme jasap.
«Ortalyqtyń Nur-Sultan qalasy boıynsha molekýlıarlyq-genetıkalyq zertteýler zerthanasy tolyq genomdyq sekvenırleý ádisimen COVID-19 oń nátıjesi bar 265 úlgini zerttedi. SARS-CoV-2 vırýsynyń genetıkalyq sıpattamasyna bul synamalar Qazaqstan Respýblıkasynyń 14 óńirinen alyndy. Nýkleotıdter tizbegin taldaý nátıjesinde mamandar 12 vırýstan «brıtandyq shtamm» genotıpin anyqtady.
12 shtamnyń 8 jaǵdaıy Sharm-el-Sheıh (Egıpet) jáne Dýbaı (Birikken Arab Ámirlikteri) halyqaralyq reısteri arqyly kelgen azamattardan tabyldy», delingen habarlamada. Ortalyqtyń málimetinshe, qazirgi ýaqytta bul elderde SARS-CoV-2 koronavırýsynyń «brıtandyq» jáne «ońtústikafrıkalyq» shtamdary kóp baıqalýda.
«Brıtandyq shtamnyń» genotıpi bar 4 vırýs Nur-Sultan, Almaty qalalarynda jáne Aqtóbe oblysynda tabyldy. Bul vırýs shetelden kelgen azamattardan taralǵan bolýy múmkin», delingen habarlamada.