Qostanaı oblysynda 5 sáýirden bastap mektepterdegi barlyq synyptar oqytýdyń aralas formatyna kóshedi. Osyǵan oraı, indetke qarsy kúres jónindegi óńirlik jedel shtab bilim berý mekemeleri sanıtarlyq qaýipsizdik sharalarynyń saqtalýyn tolyq qamtamasyz etýi kerek degen talap qoıyp otyr, dep habarlaıdy Egemen.kz.
1-sáýirden bastap oblystaǵy 300 balaǵa deıin oqytatyn mektepter dástúrli túrde jumys isteýin jalǵastyrdy.
Oblystyq bilim basqarmasynyń basshysy Z.Baımenovanyń aıtýynsha, oblystyń bas sanıtarlyq dárigeriniń jańa qaýlysyna sáıkes, tórtinshi toqsanda 114 mektep 1 sáýirde úshinshi toqsan formaty boıynsha jumys isteı bastady. Al 1-5, 9 jáne 11-synyptar - aralas formatta, 6, 7, 8, 10-synyptar qashyqtan oqıdy. 5 sáýir kúni 114 mekteptegi 1-11 synyptardyń barlyǵy aralas oqytý túrine kóshedi. Osylaısha, 5 sáýirden bastap 80 myń bala, ıaǵnı mektep oqýshylarynyń 78%-y aralas formatta oqıtyn bolady.
Ár mektep aýysym boıynsha oqıtyn synyptar sanyn, oqý kestesin jáne qashyqtan oqytylatyn pánder tizimin jeke belgileıdi.