Elordanyń mobıldi toptary kúsheıtilgen rejımde jumys isteýde. Epıdemıologııalyq jaǵdaıdyń turaqsyzdyǵyna jáne karantındik sharalardyń qatańdatylýyna qaramastan qalada kún saıyn karantın rejımin buzýshylar anyqtalýda. О́tken táýlikte mobıldik toptar osyndaı 14 faktini tirkedi, dep habarlaıdy Egemen.kz elorda ákimdiginiń resmı saıtyna silteme jasap.
Esil aýdanynyń mobıldi toptary 6 kásipkerlik sýbektiniń karantındi buzǵanyn anyqtady. Mysalǵa «Alco Market» alkogoldi ishimdikter dúkeninde maska rejımi saqtalmaǵan. Al «Happylon» attraksıondar parki, «Invictus» fıtnes-klýby, «Inforno» meıramhanasy, «Tequila» bary, «Pei Zdes» laýndj-bary belgilengen ýaqyttan keıin de jumys istedi.
Karantın rejımine qoıylǵan shekteýlerdi Saryarqa aýdanyndaǵy «Kidli kids», «Cotton Turkiye», «Kotton» dúkenderi men «Bınkovskıı» bary da buzdy.
Tártip buzýshylar qatarynda «Small» gıpermarketi, sondaı-aq Baıqońyr aýdanynyń Sembınov kóshesindegi keıbir mekemeler, Almaty aýdanyndaǵy «Panaehalı» bary jáne «Aqqaıyń» kafesi bar.
Joǵaryda atalǵan faktiler boıynsha raport jasaldy. Tártip buzýshylarǵa qatysty materıaldar kásipkerlik sýbektilerin jaýapkershilikke tartý úshin sanıtarlyq-epıdemıologııalyq baqylaý basqarmasyna joldandy.
Esterińizge sala keteıik, Nur-Sultan qalasy 10 naýryzdan bastap epıdemıologııalyq jaǵdaı boıynsha «qyzyl aımaqqa» engen. Keshe elordanyń bas memlekettik sanıtarlyq dárigeri qaladaǵy karantındik shekteýlerdi qataıtý týraly jańa qaýlyǵa qol qoıdy. Elorda turǵyndary men qonaqtarynan, sondaı-aq kásipkerlik sýbektilerinen karantın rejımin qatań saqtaýdy jáne adam kóp jınalatyn oryndardan aýlaq bolýdy talap etedi.