Premer-Mınıstr Asqar Mamınniń tóraǵalyǵymen ótken Úkimet otyrysynda jol-kólik ınfraqurylymyn damytý máseleleri qaraldy, dep habarlaıdy Egemen.kz Premer-Mınıstrdiń baspasóz qyzmetine silteme jasap.
Indýstrııa jáne ınfraqurylymdyq damý mınıstri Beıbit Atamqulov, Qyzylorda oblysynyń ákimi Gúlshara Ábdiqalyqova, Qaraǵandy oblysynyń ákimi Jeńis Qasymbek, Mańǵystaý oblysynyń ákimi Serikbaı Turymov, Pavlodar oblysynyń ákimi Ábilqaıyr Sqaqov baıandama jasady.
«Nur Otan» partııasynyń saılaýaldy baǵdarlamasynda 2025 jylǵa qaraı 12 myń shaqyrym joldy rekonstrýksııalaý jáne 27 myń shaqyrym jergilikti avtojol jelisin jóndeý boıynsha aýqymdy mindetter qoıylǵan. Bıyl 1,2 myń km jol boıynda kólik qozǵalysyn ashyp, jalpy uzyndyǵy 6 myń km avtomobıl joldaryn rekonstrýksııalaý, jóndeý jáne salý boıynsha iri jobalardy aıaqtaý kerek.
Taldyqorǵan-О́skemen (768 km), Qaraǵandy-Balqash-Qapshaǵaı (645 km), Qalbataý-Maıqapshaǵaı (415 km) jáne t.b. sııaqty iri jobalar iske asyrylady. Qyzylorda-Jezqazǵan avtojolynyń rekonstrýksııasy jobasy júzege asyryla bastaıdy. Ákimdikter 2,6 myń shaqyrym jergilikti avtojoldardy salýdy josparlap otyr. Jol boıyndaǵy servıstiń 125 jańa nysanyn salý kózdelgen.
Úkimet basshysy Indýstrııa jáne ınfraqurylymdyq damý mınıstrligine ákimdiktermen jáne «QazAvtoJol» UK» AQ-men birlesip, josparlanǵan jobalardyń ýaqtyly iske qosylýyn jáne bıyl jyl sońyna deıin bólingen qarajattyń tolyq ıgerilýin qamtamasyz etýdi tapsyrdy. Energetıka mınıstrligine qurylys maýsymynyń qyzǵan shaǵynda baǵalardyń ósýine jol bermeı, barlyq avtomobıl joldary jobalaryna bıtýmnyń málimdelgen qajettiligin qamtamasyz etý tapsyryldy.
Premer-Mınıstr bıylǵy jyldyń sońyna deıin rekonstrýksııalanǵan ýchaskelerde «aqy tóleýdi» ónerkásiptik paıdalanýǵa engize otyryp, avtomobıl joldaryn ózin-ózi qamtamasyz etýge kóshirý boıynsha jumysty aıaqtaý qajettigin atap ótti, bul avtomobıl joldaryn normatıvtik kúıde kútip-ustaýǵa múmkindik beredi. Oblys ákimdikterine «Atameken» UKP-men birlesip jol boıyndaǵy servıs obektilerin jańǵyrtý jáne olardy Ulttyq standartqa sáıkes keltirý jónindegi jumysty jandandyrý tapsyryldy.
«Qoıylǵan mindetterdi iske asyrýdyń tıimdiligi asa mańyzdy. Barlyq is-sharalar belgilengen merzimderde aıaqtalýy tıis», dedi A. Mamın.