2021 jylǵy 7-8 sáýirde onlaın formatta BUU Ekonomıkalyq jáne áleýmettik keńesiniń H Jastar forýmy (ECOSOC) ótti.
Forýmnyń negizgi taqyryby – «Turaqty damýdyń ekonomıkalyq, áleýmettik jáne ekologııalyq aspektilerine yqpal etetin COVID-19 pandemııasynan keıingi turaqtylyq pen ómirge tózimdilikti qaıta qalpyna keltirý».
Aqparat jáne qoǵamdyq damý mınıstri Aıda Balaeva óziniń beıne úndeýinde Qazaqstan Prezıdenti Q.K.Toqaevtyń BUU Bas Assambleıasynda aıtqan Volonterlerdi jumyldyrýdyń halyqaralyq jylyn jarııalaý týraly Qazaqstannyń bastamasyn qoldaýǵa shaqyrdy.
Sondaı-aq, AQDM basshysy 2021 jyly ekologııalyq aǵartý salasynda birlesken jańa jobalardy júzege asyrýdy usyndy.
«Eldiń turaqty damýynyń mańyzdy negizi qoǵamnyń ekologııalyq aǵartylýy, qoǵamnyń ekologııalyq mádenıeti bolyp tabylady. Mınıstrlik 2021 jyly BUU elderiniń jastaryn tarta otyryp, «Taza planeta» birlesken ekologııalyq aksııasyn ótkizýdi usynady», dedi A.Balaeva.
Sonymen qatar, mınıstr ózbek tarapynyń BUU alańynda jastar máseleleri boıynsha dostastyq tobyn qurý jáne BUU-nyń jastar quqyqtary týraly halyqaralyq konvensııa jobasyn ilgeriletý týraly bastamasyn Qazaqstan qoldaıtynyn atap ótti.