Elorda mańyndaǵy Selınograd aýdanynyń Qoıandy aýylynda Aqmola oblysy men Nur-Sultan qalasynyń qutqarýshylary úsh turǵyn úıden erigen qar sýyn sorý boıynsha avarııalyq-qutqarý jumystaryn júrgizýde. Onda qardyń qarqyndy erýi jáne erigen sýdyń jınalýy saldarynan úıler men aýla aýmaqtaryn sý basty. Bul týraly QR TJM resmı ókili Talǵat Ýálı habarlady.
Avarııalyq-qutqarý jumystaryn júrgizýge TJD men jergilikti atqarýshy organdarynyń kúshteri men quraldary jumyldyryldy. Atap aıtqanda 49 adam, 17 birlik tehnıka, 9 birlik motopompa.
Sonymen qatar, Selınograd aýdanynyń Talapker, Qaraótkel, Qoıandy, Araıly, Qarajar, Qyzyljar, Aqmol, Qosshy, Qabanbaı batyr, Qyzylsýat jáne Jarlykól kentterinde erigen qar sýyn sorý jumystary júrgizilýde.
Búgin saǵat 10.35-te Nur-Sultan qalasynan «Qazavıaqutqarý» AQ MI-869 tikushaǵy sý tasqyny jaǵdaıyna monıtorıng júrgizý úshin áýege kóterildi. Baǵyty Vıachaslav sý qoımasy-Qoıandy-Ilınka- Preobrajenskıı sý rettegishi. Tikushaq erneýinde Aqmola oblysy TJD, ákimdiktiń, Qazaqstan Respýblıkasy Ekologııa, geologııa jáne tabıǵı resýrstar mınıstrliginiń, «Qazgıdromet» RMK ókilderi bar.
Jaǵdaı Aqmola oblysy TJD bastyǵy Nurlan Atyǵaev pen jergilikti atqarýshy organdardyń baqylaýynda.
Aıta ketý kerek, Aqmola oblysynda qardyń erýi saldarynan sý basýǵa jol bermeý úshin eldi mekenderde qar shyǵarý jumystary júrgizilýde. Jalpy oblys boıynsha 447 813,76 tekshe metr qar shyǵaryldy. 177921,8 tekshe metr erigen qar sýy soryldy. 13482 qapqa ınertti materıaldar salynyp, tóseldi. 2511 metr bóget nyǵaıtyldy. 128084,61 metr sý burý arnalary men aryqtary tazartyldy. 2099 metr arnalar men aryqtar qalypqa keltirildi.