Nur-Sultannyń mobıldi toptary kásipkerlik sýbektilerinde karantın rejımin buzýyn anyqtaý jáne jolyn kesý boıynsha kúsheıtilgen jumys júrgizýde. Koronavırýs ınfeksııasynyń taralý qaýpine qaramastan keıbir mekemeler tıisti talaptardy júıeli túrde buzyp keledi, dep habarlaıdy Egemen.kz elorda ákimdiginiń resmı saıtyna silteme jasap.
Máselen, ótken túnde mobıldi toptar «Kalyandeli» mekemesinde kalıan shegý faktisin tirkedi. Esil aýdanynda ornalasqan kalıannyń ıelerinen túsindirme alyndy. Ákimshilik sharalar qabyldaý úshin olar Esil aýdanynyń sanıtarlyq-epıdemıologııalyq baqylaý basqarmasyna shaqyryldy.
Aıta keteıik, bir kún buryn mobıldi toptar kelýshilerge kalıan shegý boıynsha qyzmet kórsetetin birneshe tamaqtaný ornyn anyqtaǵan bolatyn.
Karantın rejımin saqtamaǵan Saryarqa aýdanynda ornalasqan «Jj Kınorýmy» da jaýapqa tartyldy.
Nur-Sultan epıdemıologııalyq ahýaldy baǵalaý matrısasy boıynsha qyzyl aımaqqa engenine bir aıdan asa ýaqyt boldy. Qaladaǵy epıdemıologııalyq jaǵdaı áli de turaqsyz bolyp otyr. Elorda turǵyndary men qonaqtary, sondaı-aq kásipkerlik sýbektileri karantındik sharalar men sanıtarlyq normalardy tolyqtaı saqtaýy tıis, bul qaýipti vırýstyń taralý qaýpin azaıtýǵa múmkindik beredi.
Sondaı-aq elorda turǵyndaryn KVI-ge qarsy jappaı vaksınasııalaý júrgizilýde. Bul ujymdyq ımmýnıtetti arttyryp, ómirdiń qalypty jaǵdaıyna oralýyna kómektesedi.