2025 jylǵa qaraı Túrkistanǵa kelýshi týrıster aǵymy 3,5 mln-ǵa deıin ulǵaıady. Bul týraly Mádenıet jáne sport mınıstri Aqtoty Raıymqulova Elbasy kitaphanasynda ótip jatqan «Túrkistan – Túrki áleminiń rýhanı astanasy» halyqaralyq onlaın-konferensııasynda aıtty, dep habarlaıdy Egemen.kz.
«Túrkistannyń Ortalyq Azııadaǵy óńirlik týrızmniń iri ortalyǵy retinde damýy úshin barlyq jaǵdaıdy jasaý mańyzdy. 2020 jyly birqatar iri joba iske asyryldy. Olardyń qatarynda Jibek joly boıynsha grand-týr jáne týrızm zııaratyn ázirleý, mádenı-tarıhı obektiler boıynsha aqparattyq týrlar, agro-týrlar boıynsha ekspedısııalar, Áziret Sultanda oqýshylar úshin arnaıy sabaqtar, sanatorıı-kýrorttyq týrızm boıynsha zertteýler de bar», dedi Aqtoty Raıymqulova.
Mınıstrdiń aıtýynsha, óńirdiń tabıǵı eskertkishteri kelýshilerdiń qyzyǵýshylyǵyn týdyrady.
«Baı tarıhty, zamanaýı ınfraqurylymdy, kóptegen tarıhı-mádenı obektilerdi jáne tabıǵı eskertkishterdi eskere otyryp, óńirdiń týrıstik áleýeti kúnnen kúnge artyp, 2025 jyly týrıster aǵymynyń 3,5 mln adamǵa deıin ulǵaıýy kútilýde. Mádenıet jáne týrızm salalarynyń sembıozy damyǵan rýhanı qoǵam qalyptastyrýǵa múmkindik beredi», dedi ol.
Eske sala keteıik, Elbasy kitaphanasynda «Túrkistan – Túrki áleminiń rýhanı astanasy» halyqaralyq onlaın-konferensııasy ótip jatyr.