Elordanyń kásipkerlik sýbektilerine shekteý sharalaryn buzǵany úshin 40 mln teńgeden astam somaǵa 200-den asa aıyppul salyndy. Bul — osy jyldyń basynan 16 sáýirge deıingi aralaý barysynda qoldanylǵan shara. Mundaı jazaǵa qaramastan biraz mekeme jurtshylyqqa qaýip tóndirip, karantın sharalaryn buzýdy áli de jalǵastyryp keledi, dep habarlaıdy Egemen.kz qala ákimdiginiń resmı saıtyna silteme jasap.
Elordanyń monıtorıngtik toptary kúsheıtilgen rejımde jumysyn jalǵastyryp keledi.
Osy jyldyń 18 sáýirinde keshki aralaý barysynda Esil aýdanyndaǵy «Chechil Pub» barynyń jumys tártibin buzǵany anyqtaldy. Sonymen qatar, tyıym salynǵanyna qaramastan kelýshilerge kalıan qyzmeti de kórsetilgen.
Sol sııaqty Saryarqa aýdanyndaǵy «Panaehalı», «Bazılık» kafeleri, «Karıma» dámdi palaý ortalyǵy, Almaty aýdanyndaǵy «Lotomatic» kafesi, Baıqońyr aýdanyndaǵy «Mangal» kafesi jáne «12 aı» qurylys dúkeni belgilengen jumys rejımin buzdy.
Atalmysh nysandardyń bárine karantın rejımin buzǵany úshin shuǵyl habarlamalar jasaldy. Tártip buzýshylarǵa qatysty ákimshilik sharalar qoldanylady.
2021 jyldyń 1 qańtarynan 16 sáýirine deıin aýdandyq polısııa basqarmalarynan bas-aıaǵy 550 materıal kelip tústi, onyń ishinde 40 mln teńgeden somasyna 200-den asa ákimshilik aıyppul qaralyp, salyndy. Al 35 mln teńgeden asa somaǵa 130-ǵa jýyq aıyppul qysqartylǵan tártippen tólendi.
Monıtorıngtik toptar kún saıyn 200-den astam kásipkerlik obektilerin aralaýdy júzege asyrady. Karantındik shekteý sharalary saqtalmaıtyn 5-ten 20-ǵa deıingi nysan anyqtalady.
«Qazirgi ýaqytta memlekettiń shaǵyn jáne orta bıznesti qoldaýy úshin júrgizip jatqan sharalaryna qaramastan kásipkerlik sýbektileri Qazaqstan Respýblıkasy zańnamasynyń talaptaryn júıeli buzyp keledi. Bul óz kezeginde tyıymdardy buzǵany úshin jaza qoldanylmaıdy, Qazaqstan Respýblıkasy zańnamalaryn attap ótýge bolady degen oıdy meńzeıdi. Al shyntýaıtynda koronavırýs ınfeksııasynyń beleń alýyna alyp keldi», — dep atap ótti elordanyń bas memlekettik sanıtarlyq dárigeri Sarhat Beısenova.