Nur-Sultanda gazdandyrý jumystary belsendi júrgizilýde. Elordanyń turǵyn úı alaptarynda 345 km oramishilik gaz taratý jelileri salyndy, dep habarlaıdy Egemen.kz qala ákiminiń baspasóz qyzmetine silteme jasap.
Eger ótken jylytý maýsymynda (2020-2021 j) Jeleznodorojnyı, Kóktal-2, Agroqalashyq bóligi turǵyn alaptaryna gazǵa qosylý múmkindigin jasalsa, jańa jylytý maýsymynda elordanyń taǵy tórt turǵyn alaby gazǵa qosylmaq. Ońtústik-Shyǵys, Jeleznodorojnyı, Kóktal-1, Agroqalashyq (2020 jyly gazǵa qosylmaǵan bóligi) turǵyn alaptaryna gaz tartý jelileriniń qurylysy júrgizilýde.
Sonymen qatar, jańa jylytý maýsymynda «QazTransGaz Aımaq» AQ Kúıgenjar, Mıchýrıno, Internasıonalnyı eldi mekenderin gazǵa qosýdy josparlap otyr.
«Bıyl bizde keremet ózgeris boldy. Gaz tartyldy. Kóbisi senbep edi. Is júzinde bári jyldam ótti. Qystyń ortasynda gazǵa qosylyp úlgerdik. О́te yńǵaıly. 24/7 úıde otyrýdyń qajeti joq, kómir saqtaý, onyń sapasy, kúl shyǵarý sekildi qıyndyqtaryn oılap kórińiz. Elordany gazdandyrý bizge Elbasynyń arqasynda keldi», dep atap ótti Úsipbek Beıimbettiń otbasy.
Elorda ákimdigi qala turǵyndary úshin áleýmettik kómektiń túrli tetikterin engizdi: jeke sektor turǵyndary úshin tegin negizde eseptegishter qarastyryldy. Sol sııaqty «Halyk bank» AQ «ECOJER» qaýymdastyǵymen birlesip, qala turǵyndaryna úılerdi gazǵa qosý úshin paıyzsyz nesıe berý uıymdastyryldy.
Sondaı-aq gazdandyrý bastalǵan sátten bastap áleýmettik az qamtylǵan otbasylardyń gazǵa kóshýi boıynsha kómek kórsetý tetigi engizildi. Jekemenshik úıi bar zeınetkerlerge, múmkindigi shekteýli eresekterge/kámeletke tolmaǵandarǵa, kópbalaly analarǵa jáne kópbalaly otbasylarǵa birjolǵy áleýmettik kómek beriledi. Negizgi talap — ózinde jáne otbasy múshelerinde basqa úıiniń bolmaýy jáne tórt eń tómen kúnkóris deńgeıinen aspaıtyn jan basyna shaqqandaǵy ortasha tabystyń bolýy (153 872 teńge).
Osy sanattardyń gazǵa qosylýy úshin
90 AEK – 262 myń 530 teńge mólsherinde aqshalaı kómek bólinedi. Áleýmettik kómektiń osy túrin alýǵa ótinimdi elektrondyq úkimet portaly egov.kz («elektrondyq ótinishter» — «Qyzmetke onlaın tapsyrys berý») arqyly qaldyrýǵa bolady.
Sonymen qatar, ótken jyly gaz tarıfi tómendetildi. Gazdyń bir tekshe metriniń baǵasy 45 teńgeden 34,6 teńgege deıin tómendedi (buryn bir tekshe metr úshin 60 teńge belgileý boljanǵan bolatyn).
Qalany gazdandyrý úsh kezeńnen turady. Gazdandyrý qala ekologııasyn aıtarlyqtaı jaqsartýǵa jáne jeke sektor turǵyndarynyń ómir súrý jaǵdaıyn jeńildetýge múmkindik beredi.