Bıyl el Táýelsizdiginiń 30 jyldyǵyn atap ótip jatyrmyz. Qıly zamanda birden-bir durys joldy tańdaı bilgen Tuńǵysh Prezıdentimiz – Elbasy Nursultan Nazarbaevtyń dana saıasatynyń sabaqtastyqpen jalǵasyn tabýynyń, Qazaqstandy mekendegen etnostardyń syn kezeńderde shyńdalǵan birligi men tatýlyǵynyń arqasynda shańyraǵymyz shaıqalmaı, otyz jyl boıy elimizde ushan-teńiz ıgi ister atqaryldy.
«Tórteý túgel bolsa, tóbedegi keledi»
«Jigerli bolsa er bolar, birlikte bolsa el bolar» dep aıtqan Jambyl atamyzdyń sóziniń aıǵaǵy – halqymyzdyń yntymaq pen birlikte, bir atanyń balasyndaı ómir súrip jatqandyǵy. Qoǵamdyq kelisim men toleranttylyqty nyǵaıtýǵa barsha etnos ókilderi jumyldyrylyp, elimizdiń damýy baǵytynda orasan zor qyzmet atqardy.
Mindeti men maqsaty aıqyn Qazaqstan halqy Assambleıasy elimizdiń yntymaǵy men tatýlyǵyn, birligin nyǵaıtýǵa, bir shańyraq astynda aırandaı uıyp, turaqtylyq pen ornyqty damýymyzǵa súbeli úlesin qosyp keledi. Osy oraıda Qazaqstan halqy Assambleıasy memlekettik organdarmen birlese otyryp, qoǵamdaǵy etnosaralyq kelisimdi jáne toleranttylyqty damytyp qana qoımaı, ekstremızm men radıkalızm kórinisterine qarsy áreket, azamattardyń saıası quqyqtaryn qalyptastyrýǵa kómek kórsetý, sondaı-aq Qazaqstan halqynyń ulttyq mádenıeti, tilderi men dástúrleriniń órkendeýin, saqtalýyn, damýyn qamtamasyz etýdi basty nazarda ustap otyr.
Toleranttylyq degen ǵylymı uǵymnyń mánin qazaq «Keń bolsań, kem bolmaısyń» degen bir ǵana maqalǵa syıǵyzǵan. Búginde elimizdiń barlyq aımaǵynda túrli etnostardyń etno-mádenı ortalyqtary jumys isteıdi. Qazaqtyń kemeńger jazýshysy Muhtar Áýezovtiń «El bolamyn deseń, besigińdi túze» degen dana sózin sanama túıip, Qazaqstan halqy Assambleıasynyń múshesi, sondaı-aq «Úmit» balalar úıiniń dırektory retinde bala tárbıesin azamattyq boryshym dep bilemin. Kópetnosty memlekette ómir súretin balalarǵa tárbıe berýde olardyń boıyndaǵy ózge etnostardy syılaý, olardyń mádenıetin qurmetteý, iskerlik qarym-qatynas pen jalpy adamı máselelerdi sheshý sııaqty jaǵymdy ádetterdi qalyptastyrý kerek. Sonymen qatar, túrli mádenıetti tanyp bilýge shaqyryp, Abaıdyń «Adamzattyń bárin súı, baýyrym dep» degen qaǵıdasy negizinde, olardyń boılaryna basqa halyqtarmen dostasa alatyn daǵdylar men minez-qulyqtardy sińirý kerek dep oılaımyn.
Biz búginde Qazaqstanda túrli etnos ókilderi kelisim men beıbitshilikte ómir súrip jatqandyǵyn maqtan etemiz. Bul óskeleń urpaqty etnosaralyq tatýlyqqa tárbıeleýdiń arqasynda qol jetkizgen jetistigimiz. Mysaly, «Úmit» balalar úıinde 11 etnostyń balalaryn tárbıelep júrmiz. Munda ár etnostyń balalarynyń basyn biriktiretin balalar assambleıasy qurylǵan. Balalar Dostyq úıi janynan qurylǵan jeksenbilik mektepte óz etnostarynyń adamdarymen qarym-qatynas jasap, týǵan tilderin úırenip, salt-dástúr, ádet-ǵuryptarymen tanysýǵa zor múmkindik aldy. Dostyq úıiniń túrli etnos ókilderi Balalar úıine júıeli túrde kelip, merekeler men festıvaldar ótkizedi.
1 mamyr – Qazaqstan halqynyń birligi kúnine oraı merekelik sharalar ótkizý dástúrge aınalǵan. Bul kúni ulttyq taǵamdar daıyndalyp, ulttyq kıimder kıilip, ár tilde án shyrqalyp, bı bılenip, ulttyq salt-dástúrler kórsetiledi. Munyń barlyǵy ár balanyń sanasyna óz halqyna degen qurmet pen maqtanysh sezimin uıalatyp, olardy ózge etnos ókilderin qurmetteýge baýlıtyny sózsiz.
Halyqtyń aýyzbirshiligi bolsa, alynbaıtyn qamal joq. «Altaý ala bolsa aýyzdaǵy ketedi, tórteý túgel bolsa tóbedegi keledi». Bizdiń birligimiz – Qazaqstannyń ıgiligi!
Marııa BEISEQANOVA,
Qazaqstan halqy Assambleıasynyń múshesi, Shyǵys Qazaqstan oblystyq bilim basqarmasynyń «Úmit» balalar úıi KMM dırektory