Soltústiktegi kórshi elde 1 mamyrdan bastap, 10 mamyrǵa deıin demalys jarııalandy. Al jumysshylardyń jalaqysy saqtalady. Reseı bıligi bul sheshimdi elde epıdemıologııalyq jaǵdaı turaqtalady degen úmitpen qabyldaǵan, dep habarlaıdy Egemen.kz news1.ru saıtyna silteme jasap.
4 mamyrdan 7 mamyrǵa deıingi jumys kúnderi tólenýi tıis jalaqy saqtalatyn boldy. Tıisti sheshimdi RF prezıdenti Vladımır Pýtın qabyldaǵan.
Reseıdegi Tutynýshylardyń quqyqtaryn qorǵaý jáne adamnyń ál-aýqatyn baqylaý jónindegi federaldy qyzmet basshysy Anna Popova Reseı basshysyna mamyr aıyndaǵy demalysty uzartý kerektigi jóninde usynys jasaǵan. Ol reseılikter úshin qos mereke arasyndaǵy úzilis halyqtyń qaladan-qalaǵa birneshe ret sapar shegýine áser etetindigin aıtqan. Epıdemıologtar qazirgideı jaǵdaıda mundaı jıi qarym-qatynastar qaýip týdyrady dep sanaıdy.
Anna Popova úzilissiz demalys Reseıdegi epıdemıologııalyq ahýaldy turaqtandyrady dep esepteıdi. Qazirgi ýaqytta Reseıde COVID-19-ǵa qatysty jaǵdaı «azdy-kópti turaqty» dep baǵalanady. Bul týraly vıse-premer Tatıana Golıkova aıtty. Onyń aıtýynsha, epıdemıologııalyq baqylaý kún saıyn júrgizilip otyr. Sonymen qatar ol óńirlerde birtindep shekteýlerdi azaıtyp, azamattarǵa koronavırýsty ınfeksııaǵa qarsy vaksına qabyldaý kerek ekendigin eskertti.
Foto Natalı Selıverstovoı, RIA Novostı.
Esterińizge sala keteıik, 23 sáýirde Reseı prezıdenti Vladımır Pýtın mamyr aıyndaǵy demalys kúnderin uzartý týraly bastamamen keliskeni belgili bolǵan edi.
Reseı Federasııasy prezıdentiniń baspasóz hatshysy Dmıtrıı Peskov uzaq merzimdi demalys jaıly sheshimge túsinikteme berip, lokdaýn týraly áńgime bolmaǵanyn, sondyqtan barlar, meıramhanalar men mýzeılerdiń jumysy retsiz toqtamaıtynyn jetkizdi.