Premer-Mınıstr Asqar Mamınniń tóraǵalyǵymen ótken Úkimet otyrysynda halyqty jumyspen qamtý sharalary týraly eńbek jáne halyqty áleýmettik qorǵaý mınıstri Serik Shápkenov, «Atameken» UKP basqarma tóraǵasy Abylaı Myrzahmetov jáne oblys ákimderi baıandady, dep habarlaıdy Egemen.kz Premer-Mınıstrdiń baspasóz qyzmetine silteme jasap.
eńbek jáne halyqty áleýmettik qorǵaý mınıstri S. Shápkenovtiń aıtýynsha, eńbek naryǵynyń negizgi ındıkatorlary pandemııaǵa qaramastan turaqty bolyp qaldy. Sońǵy úsh jylda jumys kúshiniń sany 43 myń adamǵa artty. Bul jaldamaly jumyskerler men ózin-ózi jumyspen qamtyǵandar sanynyń qysqarýy esebinen boldy. Bul rette, eńbek naryǵyn sıpattaıtyn negizgi kórsetkish – jumyssyzdyq deńgeıi 4,9% kóleminde saqtaldy. 2020 jyldyń ekinshi toqsanynda ýaqytsha jumyspen qamtylmaǵan halyq sany 4,1 esege ósip, 536 myń adamdy qurady. Degenmen, shekteý sharalary kezinde beıresmı jumyspen qamtylǵandar sanynyń azaıýy baıqaldy.
«Búgingi tańda ekonomıkanyń birtindep qalpyna kelýi baıqalýda, bul eńbek naryǵyna jaǵymdy áser etýde», dedi mınıstr.
«Nur Otan» partııasynyń saılaýaldy tuǵyrnamasyn iske asyrý jónindegi mindetterdi eskere otyryp, aǵymdaǵy jyly 1,2 mln adamdy jumyspen qamtý sharalary arqyly qoldaý josparlanǵan. Olardyń 700 myńyn «Eńbek» memlekettik baǵdarlamasymen, 32 myń adamdy Jumyspen qamtýdyń Jol kartasymen, 440 myń adamdy ózge de memlekettik baǵdarlamalarmen qamtý kózdelgen. «Eńbek» baǵdarlamasy boıynsha qamtylatyn 227 myń adamǵa jumyspen qamtýǵa járdemdesýdiń túrli sharalary kórsetiledi. Olar 3 baǵytty qamtıdy: qysqa merzimdi oqytýǵa, tehnıkalyq jáne kásibı bilim alýǵa 36 myń adam jiberiledi; «Bastaý Bıznes» jobasy boıynsha 10,5 myń adamdy bıznes daǵdylaryna oqytý bastaldy, jyl sońyna deıin 30 myń adam oqytylady. Bıyl óz isin ashý jáne keńeıtý úshin 5 myń shaǵyn nesıe beriledi; sýbsıdııalanatyn jumys oryndarynyń esebinen eńbek naryǵyna beıimdelý qıynǵa túsetin adamdar qatarynan 128 myń adamǵa qoldaý jáne 7 myń adamnyń óz erkimen qonys aýdarýyna qoldaý kórsetiledi. Bıyl úsh aıda «Eńbek» memlekettik baǵdarlamasymen 158 myń adam qamtyldy, onyń ishinde 53,5%-y jastar praktıkasy, áleýmettik jumys oryndary jáne qoǵamdyq jumystar sııaqty sýbsıdııalanatyn jumys oryndaryna jumysqa ornalastyryldy. Al 32,4%-y turaqty jumyspen qamtyldy.
«Eńbek» memlekettik baǵdarlamasynyń bes is-sharasy «Nur Otan» partııasynyń saılaýaldy platformasyna kirdi jáne olardy iske asyrý boıynsha josparly jumys júrgizilýde. Memleket basshysynyń tapsyrmasyna sáıkes aǵymdaǵy jyly Jumyspen qamtýdyń Jol kartasyn iske asyrý jalǵastyrylady.
«Búginde jergilikti atqarýshy organdar 32 myń jumys ornyn, onyń ishinde 12 myń turaqty jumys ornyn qura otyryp, 378 ınfraqurylymdyq jobany iriktedi. Jol kartasyn iske asyrý sharttary turaqty jumys oryndaryn qurýǵa negizdelip ózektendirildi», dedi S. Shápkenov.
Jumyspen qamtý jol kartasy 6%-dan aspaıtyn mólsherlememen jeńildetilgen shaǵyn nesıe berý boıynsha jańa baǵytpen tolyqtyryldy. Nesıe alýshylarmen qosymsha 11 myń jumys orny ashylady. Sonymen qatar eńbek jáne halyqty áleýmettik qorǵaý mınıstriniń aıtýynsha, ózge memlekettik baǵdarlamalar aıasynda 440 myń jumys ornyn qurý josparlanǵan. Bul rette jumys oryndaryn qurý jónindegi mindetti ındıkatorlar salalyq memlekettik organdardyń ulttyq jobalarynda aıqyndalatyn bolady, al jergilikti jerlerdegi ákimdikter óńirlik jumyspen qamtý kartalaryn qabyldaýdy qamtamasyz etýleri tıis.
Memleket basshysynyń tapsyrmasyna sáıkes bıylǵy jylǵy 1 shildeden bastap «Eńbek» memlekettik baǵdarlamasy Ulttyq jobaǵa aýystyrylady. Bul oraıda, quraldar men mindetter jańa ádisnamaǵa sáıkes tek ózektendirilip qana qoımaı, oǵan múldem jańa tetikter men bıznes-prosester engiziledi. Atap aıtqanda, birinshi mindet boıynsha eńbek resýrstary daǵdylaryn damytýda jumys berýshiniń naqty qajettilikterine oraı praktıkalyq daǵdylardy alýǵa basa nazar aýdarylatyn bolady. Elektrondyq eńbek bırjasy bazasynda naryqta suranysqa ıe mamandyqtar boıynsha onlaın-oqytýdyń jalpyulttyq platformasy iske qosylady. Ekinshi baǵyt aıasynda kásipkerlik bastamalardy qoldaý arqyly halyqtyń tabysyn arttyrý qarastyrylady.
«Bul jerde biz eńbek bırjasy bazasynda kásipkerlik bastamalardy qoldaýdyń “biryńǵaı terezesin” engizýdi josparlap otyrmyz», — dedi S. Shápkenov.
Nesıelendirý jáne granttyq qoldaý úshin bıznes-jobalardy irikteý óńirlerdiń qajettiligine qaraı júzege asyrylady. Úshinshi mindet nysanaly toptardy ataýly túrde qoldaýǵa negizdeledi. Bul rette olardyń qajettilikterine qaraı jumyspen qamtýǵa járdemdesý jónindegi jekelegen jobalar iske asyrylady.
Sondaı-aq, jumyspen qamtý qyzmetteri onlaın jáne proaktıvti túrde, ıaǵnı ótinish berýsiz-aq keńinen usynylatyn bolady. Ulttyq joba sheńberinde qabyldanyp jatqan sharalar bolashaqta halyqtyń ómir súrý sapasyn jaqsartýǵa jáne naqty aqshalaı tabystyń 27%-ǵa, eńbekaqynyń 304 myń teńgege deıin ósýine, jańa jumys oryndaryn qurýǵa yqpal etedi. Bıylǵy jyldyń sońyna qaraı jumyssyzdyq deńgeıi 4,9% sheginde saqtalady dep kútilýde.
«Atameken» UKP basqarma tóraǵasy Abylaı Myrzahmetov 2021 jyly «Bastaý Bıznes» jobasy aıasynda 30 myń adamdy kásipkerlik negizderine oqytý josparlanǵanyn aıtty. Aǵymdaǵy jylǵy 26 sáýirdegi jaǵdaı boıynsha 10,5 myń adamnan quralǵan bilim alýshylardyń alǵashqy legi qalyptastyryldy.
Pavlodar oblysynyń ákimi Ábilqaıyr Sqaqov oblysta eńbek naryǵyndaǵy jaǵdaı turaqty ekenin habarlady. 2020 jyly jumyspen qamtý sharalarymen 33,7 myń adam nemese jospardan 105,8% qamtyldy. Ekonomıkalyq turǵydan belsendi halyq sanynyń 95%-dan astamy jumys isteıdi. Olardyń 23%-y — ónerkásip, 16%-y — aýyl sharýashylyǵy jáne 14%-y qyzmet kórsetý salalarynda.
«Bıyl 32,8 myńnan astam adamdy qamtý josparlanǵan, onyń 20 myńy – jańa jumys oryndary. Búginge deıin, jyl basynan beri 5 682 jańa jumys orny quryldy, onyń 40%-y — turaqty jumys orny», dedi oblys ákimi.
«Eńbek» baǵdarlamasy sheńberinde 2 860 adam jumysqa ornalasty. Tehnıkalyq jáne kásiptik bilimi bar kadrlardy qaıta daıarlaýǵa 225 adam jiberildi. «Bastaý Bıznes» jobasy boıynsha onlaın oqytýmen 909 adam qamtyldy. Qaryzdardy qaıta qarjylandyrý esebinen 39 shaǵyn nesıe berildi. 245 adam bıznes-ıdeıalaryn damytýǵa grant aldy.
«Qazirgi kezde óńirlik kvotaǵa 466 adam engizildi, onyń ishinde 197 qandas jáne 269 qonys aýdarýshy bar. Jalpy, «Eńbek» baǵdarlamasymen 7 057 adam qamtylǵan, onyń 57%-y turaqty jumys oryndarymen qamtyldy», dedi Á. Sqaqov.
Jumyspen qamtý jol kartasy boıynsha 13,8 mlrd teńge qarastyrylǵan, onyń ishinde 1 mlrd teńge – shaǵyn nesıe berýge, 12,8 mlrd teńge 18 ınfraqurylymdyq jobany iske asyrýǵa baǵyttalady.
«966 jumys ornyn qurý josparlanǵan, onyń ishinde 32%-y – turaqty jumys orny. 80%-ǵa jýyq joba boıynsha konkýrstyq rásimder jarııalandy, eki joba boıynsha merdigerler anyqtaldy, Ekibastuzda turǵyn úı qurylysy boıynsha jumystar bastaldy», dedi oblys basshysy.
Qyzylorda oblysynyń ákimi Gúlshara Ábdiqalyqovanyń aıtýynsha, ótken jyldyń qorytyndysy boıynsha oblysta jumyspen qamtylǵandar sany 329,4 myń adam bolsa, jumyssyzdyq deńgeıi 4,9%, onyń ishindegi jastar arasyndaǵy jumyssyzdyq deńgeıi 4,3% qurady. Oblys boıynsha negizgi jumyspen qamtýdy qajet etetinder sany 36,8 myń adamdy quraıdy.
«2021 jyly «Eńbek» memlekettik baǵdarlamasymen 17 768 adamdy jumyspen qamtý josparlanǵan. Birinshi toqsannyń nátıjesimen 9 357 adam baǵdarlamaǵa engizilip, 7 900-y sýbsıdııalanatyn jumys oryndarymen qamtyldy.Al, turaqty jumyspen qamtylǵandar 22,5% qurady», dedi G. Ábdiqalyqova.
О́ńirde jyl sońyna deıin «Eńbek» baǵdarlamasy arqyly 4 601 adamdy, «Jumyspen qamtý Jol kartasy» arqyly 961 adamdy, Indýstrııalyq-ınnovasııalyq damý baǵdarlamasymen iske qosylatyn 4 jobada 506 adamdy, «Qyzylorda oblysynyń 2023 jylǵa deıingi ekonomıkalyq damý josparyna» sáıkes bıyl júzege asyrylatyn 96 jobada 895 adamdy jáne jeke bastamalar esebinen 4 941 adamdy jumyspen qamtý sharalarymen qamtý kózdelgen.
«Osylaısha, jyl sońyna deıin barlyǵy 11 904 adamdy nemese 67%-y turaqty jumyspen qamtylyp, jumyssyzdyq kórsetkishi 4,9% deńgeıinde saqtalyp qalady», dedi oblys basshysy.