Qorshaǵan ortanyń tazalyǵy – turǵyndar mádenıetiniń kórsetkishi. Al bir aýmaqtaǵy turǵyndar túgelimen múmkindigi shekteýli jandar bolsa she?.. Onda olarǵa sózsiz kómek kerek. Elordalyq eriktiler kópke úlgi bolyp, azamattyq tanytyp, «DOS» «Táýelsiz ómir» ortalyǵy múgedekteriniń qoǵamdyq birlestigi aýmaǵyn tazartty.
El egemendiginiń 30 jyldyq mereıtoıyna oraı elordada qala ómirine belsene atsalysyp, turǵyndarǵa qoldaý kórsetý maqsatynda «30 IGI IS» áleýmettik jáne qaıyrymdylyq is-sharalary ótip jatyr. Osy «30 IGI IS» qaıyrymdylyq aksııasy aıasynda Nur-Sultan qalasy ákimdigi «Astana jastary» uıymy men astanalyq volonterler «DOS» «Táýelsiz ómir» ortalyǵy múgedekteriniń qoǵamdyq birlestigi aýmaǵynda tazalyq jumystaryn júrgizdi.
«Astana jastary» jastar resýrstyq ortalyǵy Uıymdastyrý bóliminiń basshysy Araılym Saparaly: «Bul qaıyrymdylyq is-shara Qazaqstan táýelsizdiginiń 30 jyldyǵyna arnalǵan qaıyrymdy ister marafony aıasynda iske asyrylyp jatyr. Volonterler osylaı múmkindigi shekteýli adamdardyń aýlasyn qoqystardan tazartyp, onda kóshet otyrǵyzyp, burynnan ósip turǵan aǵashtardyń topyraǵyn qopsytyp, túbin áktep, jalpy abattandyrý, kógaldandyrý jumystaryn júrgizdi. Osy jumysqa 15-ke jýyq volonter belsene qatysty. Aldaǵy ýaqytta qaıyrymdylyq jumys jalǵasyn tabady», dedi.
Bir jarym jyldan beri azamattyq ispen aınalysyp júrgen volonter Amangeldi Oljas óz ıdeıalasymen birge birshama ıgi is-sharanyń basy-qasynda bolǵanyn aıtty.
«Ýnıversıtettegi oqýymdy bitirgen soń jumysqa ornalastym. Sodan keıin bos ýaqyt paıda bola bastady. Men sol ýaqytymdy jaqsy iske jumsaýdy jón kórdim. Mine, sol bir jarym jyldan beri volonterlikpen aınalysyp júrmin. Osy qysqa ǵana ýaqytta ortaq maqsatty azamattarmen birge qalany kórkeıtýge, turǵyndarǵa kómek kórsetýge baǵyttalǵan kóptegen qaıyrymdylyq jumysqa qatystyq. Osy joly da táýelsizdiktiń qurdastary retinde egemendiktiń mereıtoıyna oraı uıymdastyrylǵan qaıyrymdy iske jumyldyq. О́zderińiz biletindeı, qystan keıin qala qatty lastanady. Aınalany kúl-qoqystan, qar astynda 3-4 aı boıy kórinbeı jatqan qaldyqtardan tazartý qajet. О́z qalamyzdyń tazalyǵyna ózimiz jaýap berýge tıispiz. Biraq mundaı múmkindikten ada adamdar, ıaǵnı fızıkalyq jumysqa jaramaıtyn jandar da bar. Olarǵa álbette kómek kerek. Biz kómek kórsettik», dedi volonter A.Oljas.
Aıta ketelik, qalany kógaldandyrýǵa, abattandyrýǵa belsene atsalysyp, qalanyń ekologııalyq damýyna úles qosqan uıym qyzmetkerleri men volonterler is-shara barysynda sanıtarlyq normalardy saqtady. Barlyq qatysýshy betperdemen jáne qolǵappen qamtamasyz etildi.