Oral qalasynda eki avtokólik soqtyǵysyp, tórt adam zardap shekti, dep habarlaıdy Egemen.kz
Batys Qazaqstan oblystyq polısııa departamentiniń resmı ókili Bolatbek Belgibekovtiń málim etkenindeı, oqıǵa búgin túnde Derkól kentinde boldy.
Saǵat 00:40 shamasynda belgisiz júrgizýshi Belınskıı kóshesi men Okrýjnoe tas joly qıylysynda 1994 jylǵy júrgizýshi aıdap kele jatqan «VAZ-21154» avtokóligine jol bermeı, soqtyǵysqan. Sodan keıin belgisiz júrgizýshi oqıǵa ornynan boı tasalaǵanmen, saǵat 01:10 shamasynda atalǵan avtokólik A.Taımanov pen M.Mámetova kósheleriniń qıylysynda toqtatyldy.
Jol apaty saldarynan «VAZ-21154» avtokóliginde otyrǵan tórt adam jaraqat aldy. Kólik ıelerine materıaldyq shyǵyn da keltirildi.
BQO densaýlyq saqtaý basqarmasynyń baspasóz qyzmeti naqtylaǵanyndaı, «Úmit» shaǵynaýdanyna qaraı joldaǵy kópir mańynda bolǵan jol apatynan keıin jedel járdem saǵat 00.48-de shaqyryldy.
Jol-kólik oqıǵasy saldarynan 4 adam zardap shekse, bireýi – 2020 jylǵy qyz bala. Ol oblystyq balalar aýrýhanasyna jetkizildi. Dárigerler qaraǵannan keıin jumsaq tinderiniń kógergeni anyqtalyp, ambýlatorlyq em alýǵa jiberildi.
Úsh eresek adam oblystyq kópbeıindi aýrýhanaǵa jetkizildi. 1974 jylǵy áıeldiń keýde tusy men ıyǵy kógergen. Onymen qurdas er adamnyń samaı tusy kógergen. 1998 jylǵy áıeldiń mańdaı tusy isip ketken. Ony dárigerler qaraǵannan keıin ambýlatorlyq em alýǵa jiberdi.