Túrkistanǵa sapary barysynda Tuńǵysh Prezıdent jańadan salynǵan mýzykalyq drama teatrynda bolyp, ujymmen kezdesti.
Jańa teatrda túrki álemine ortaq qoıylymdar sahnalanady. Kompozısııalyq kórinisi men sáýlettik kelbeti ózgeshe teatrda sheteldik tanymal óner qaıratkerleri de óner kórsetedi. Tórt qabatty óner ordasynyń kórermender zaly 510 adamǵa arnalǵan. Munda vestıbıýldiń, kýlýarlardyń, foıeniń, jınaqtaý holldary men VIP zaldar ulttyq naqyshpen bezendirilgen. Teatrda kórermenderge jáne qyzmettik personalǵa shuǵyl medısınalyq kómek kórsetetin dárigerge deıin qarastyrylǵan. Teatrdyń bas dırektory Aınur Kópbasarovanyń aıtýynsha, 190 adam shtattyq rejımde jumys isteı alady. Qazir akterlardy jumysqa qabyldaý júrýde. Olardyń qatarynda Dýbaıda, Máskeýde tájirıbe jınaǵan rejısserlar men kompozıtorlar, menedjerler bar. Jańa ǵımarattyń jalpy aýdany 11 myń sharshy metrden asady. Teatr basshylyǵynyń málimetinshe, alǵashqy qoıylym 5-shi qyrkúıekte kórermender nazaryna usynylady. Oǵan deıin sahnany bezendirý, qajetti qural-jabdyqtarmen qamtamasyz etý jumystary da júrgizilmek.
Elbasy mýzykalyq drama teatry ǵımaratynda jýrnalıstermen suhbattasyp, Túrkistannyń búgini men erteńi jaıly pikirin bildirdi.