Nur-Sultan qalasynyń ákimi Altaı Kólginov Instagram paraqshasynda bilim mekemelerinde qaýipsizdik qalaı saqtalatynyn aıtty, dep habarlaıdy Egemen.kz.
«Oqýshylar ózderin mektep qabyrǵasynda qaýipsiz sezinýi kerek. Ol úshin birqatar sharalar qabyldandy. Mektepter kameralarmen, dabyl túımelerimen, týrnıkettermen jabdyqtaldy. Mektep basshylary kúzet uıymdarymen sharttar jasasty. Degenmen áli de birqatar másele bar. Onlaın rejımde mektep dırektorlarymen ózekti máseleler talqylandy.
Birinshi, barlyq oqý oryndary beınebaqylaý kameralarymen jabdyqtalǵan. Degenmen beınebaqylaý arqyly kamera «kózi túspeıtin» aımaqtardy da qamtý qajet.
Ekinshi, kúzet uıymdarymen sharttar jasaldy. Atalǵan uıymdarǵa qoıylatyn talaptardy kúsheıtýdi tapsyrdym. Sebebi muǵalimder men oqýshylardyń qaýipsizdigin qamtamasyz etý mańyzdy.
Úshinshi, júgensiz jasóspirimder men qıyn jaǵdaıǵa tap bolǵandardy anyqtaýda oqý oryndarynyń qyzmetkerleri mańyzdy ról atqarady. Mektep psıhologtarynyń, medısına qyzmetkerleriniń jáne ıývenaldy polısııa qyzmetkerleriniń jumysyn kúsheıtý qajet. Sondaı-aq qoǵamdaǵy moraldyq qundylyqtardy nyǵaıtý, synyptardaǵy ahýaldy jaqsartý jónindegi jumystardy turaqty negizde júrgizý qajet.
Tórtinshi, ár mektepte fakýltatıvti sabaqtar ótkiziledi, onda oqýshylarǵa qaýip týyndaǵan kezde ózin qalaı ustaý kerektigi túsindiriledi. Bul sabaqtarǵa nazar aýdaryp, oǵan barynsha baıyppen qaraý kerek», deıdi Kólginov.
Onyń aıtýynsha, joǵaryda aıtylǵandardy eskere otyryp, Bilim basqarmasynyń basshysy men mektep dırektorlaryna qosymsha jabdyqtar satyp alý úshin tizimderdi usyný tapsyrylǵan. Mektepterdi qosymsha beınebaqylaý kameralarymen, týrnıkettermen jáne basqa da arnaıy tehnıkamen jabdyqtaý qajet.
«Qazan qalasyndaǵy mektepte bolǵan qaıǵyly oqıǵadan árkim sabaq alýy kerek: oqý oryndarynyń qaýipsizdigin qamtamasyz etý árqaısymyzǵa baılanysty. Oqýshylar men muǵalimderdiń qaýipsizdigi máselelerine jaýapsyzdyq tanytpaý qajet», dep jazdy ákim.