Búgingi kúnge deıin Aqmola oblysynda 88 myńnan astam adam ekpe aldy. Osy rette oblys ortalyǵy – Kókshetaý qalasynan bólek, Stepnogorda da turǵyndarǵa vaksına salý jumysy qarqyndy júrip jatyr, dep habarlaıdy Egemen.kz oblystyq ishki saıasat basqarmasyna silteme jasap.
Vedomstvonyń málimetinshe, qazirgi tańda densaýlyq saqtaý júıesinde birinshi kezektegi mindet – turaqty epıdemıologııalyq jaǵdaıdy qamtamasyz etý, koronovırýs ınfeksııasynyń taralýyna jol bermeý.
Bul úshin óńirde barlyq yqtımal pármendi sharalar men shekteýler qabyldanyp jatyr.
Aýrýdy jeńýge jáne burynǵa qalypty ómirimizge oralýǵa múmkindik beretin jol – ekpe salý.
«Stepnogor óńirinde vaksına partııalarynyń túsýine sáıkes halyqty koronavırýstyq ınfeksııadan vaksınasııalaý josparly túrde júrgizilýde. 4,7 myń adam ekpe aldy. Birinshi kezeńde vaksınasııa densaýlyq saqtaý, bilim berý, quqyq qorǵaý organdarynyń qyzmetkerleri arasynda júrgizildi. Qazirgi ýaqytta ujymdyq ótinimder oryndalyp jatyr, sondaı-aq saýda ortalyqtarynda vaksınasııa júrgizilýde, turǵyndar, sonyń ishinde qarttar da vaksınasııaǵa belsendi qatysýda» deıdi qalalyq emhana ákimshiligi.
Aımaqtaǵy densaýlyq saqtaý salasynda birshama ózgerister qarqyn alyp keledi.
О́tken jyldyń shilde aıynda qalalyq emhana «Viamedis» JShS memlekettik-jekemenshik áriptestigine berildi.
Búginde ǵımaratty kúrdeli jóndeý aıaqtalý satysynda, bólimshelerdiń bir bóligi jańa formatta jumys istep jatyr.
Jańa jabdyqtar satyp alyndy: kompıýterlik tomograf, sandyq rentgen apparaty jáne mammograf, ÝDZ apparattary, EKG apparattary.
Operasııalyq blokty ashý josparda bar, bul ambýlatorııalyq negizde operasııalyq aralasýdyń keń spektrin oryndaýǵa múmkindik beredi.
Kadrmen qamtamasyz etý kórsetkishi jaqsardy. Máselen, dárigermen qamtý 71 paıyzdan 78 paıyzǵa deıin, orta medısınalyq personalmen qamtý 78 paıyzdan 81 paıyzǵa deıin ózgerdi.
Sondaı-aq «Viamedis» JShS Bestóbe kentinde jańa dárigerlik ambýlatorııanyń qurylysyn aıaqtap qaldy. Ony bıylǵy jyldyń úshinshi toqsanynda iske qosý josparlanyp otyr.
Jalpy oblys boıynsha 2020 jyldyń qorytyndysy boıynsha 3 nysan quryldy (Kókshetaý qalasyndaǵy onkologııalyq emhana, Shortandy aýdanynyń Stepnoe aýylynda aýysymda 25 adam qabyldaıtyndárigerlik ambýlatorııa, Selınograd aýdanynyń Sofıevka aýylynda 50 adam qabyldaıtyn dárigerlik ambýlatorııa).
Sonymen qatar Selınograd aýdany Qosshy aýylynda aýdandyq emhananyń qurylysy aıaqtalyp qaldy.