Debat oıyndarynyń belsendi qatysýshylarymen kezdesý barysynda vedomstvo basshysy Ashat Aımaǵambetov elimizde oqýshylar men stýdentter arasyndaǵy debat qozǵalysy qaıta jandanyp jatqanyn jáne debattar mektep, kolledj, joǵary oqý oryndaryndaǵy tárbıe jumysynyń ajyramas bóligine aınalatynyn atap ótti, dep habarlaıdy Egemen.kz.
Kezdesýge respýblıkanyń barlyq aýdany men qalasynan debat úılestirýshileri, bilim basqarmalarynyń basshylary, joǵary oqý oryndarynyń prorektorlary, mektep jáne stýdenttik debat klýbtarynyń belsendi debaterleri shaqyryldy.
Bilim jáne ǵylym mınıstrligi Qazaqstanda debat qozǵalysyn damytý tujyrymdamasyn jáne oqýshylar, stýdentter arasynda debat týrnırlerin ótkizý qaǵıdalaryn ázirledi. Jattyqtyrýshylardy daıarlaý boıynsha jumys júrgizilip, debat klýbtary ashylyp jatyr.
«Debatty oıyn retinde emes, bilim berý tehnologııasy dep qabyldaýymyz qajet. Sondyqtan bul qozǵalysty belsendi túrde damytyp jatyrmyz. Biz Qazaqstanda debat qozǵalysyn damytý tujyrymdamasyn jáne oqýshylar men stýdentter arasynda debat týrnırlerin ótkizý qaǵıdalaryn ázirledik. Mınıstrliktiń «Oqýǵa qushtar mektep», «Mekteptegi jáne stýdenttik ózin-ózi basqarý» sııaqty jobalarymen birge «Debattar» jobasyna da barlyq bilim berý uıymynda basa mán berilýi tıis», dedi mınıstr Ashat Aımaǵambetov
Sondaı-aq BǴM basshysy stýdenttik jyldary ózi de debat oıyndaryna belsendi qatysqanyn tilge tıek etip, balalarmen óz tájirıbesimen bólisti.
«Debat adam boıynda mańyzdy daǵdylardy qalyptastyrady. Máselen, bul tájirıbe maǵan kóp paıdasyn tıgizdi jáne qazir jumys barysynda da kómektesedi. Sondyqtan balalardyń synı oılaý qabiletin damytý, komandada jumys isteýge baýlý, suraqtarǵa jaýap berý, óz pikirińdi dáleldeý, balalardyń óz oılaryn durys tujyrymdaýy úshin bizge osy bilim berý tehnologııasyn belsendi qoldaný qajet», dep atap ótti mınıstr.
Sonymen qatar Ashat Aımaǵambetov debat qozǵalysynyń damýy qaǵaz júzinde bolmaýy tıis ekenin atap ótti. Osy rette balanyń qyzyǵýshylyǵyn týǵyzyp, oǵan jeke qasıetterin damytýǵa kómektesý mańyzdy. Aıta ketken jón, debat týrnırleriniń jeńimpazdary joǵary oqý oryndary rektorlarynyń granttaryn ala alady.