Fınlıandııada ótken aptada qyzyq oqıǵa boldy. El premer-mınıstri Sanna Marınniń tańǵy asqa jumsaǵan shyǵyny halyq arasynda qyzý talqyǵa túsip jatyr. Eýropa úshin sheneýnikterdiń bıýdjet aqshasyn qalaı paıdalanǵanyn qadaǵalaý – qalypty jaǵdaı.
Máseleniń bári jergilikti buqaralyq aqparat quraldarynda premer-mınıstrdiń resmı rezıdensııasynda tańǵy asqa jumsalatyn shyǵyn birden ósip ketkeni týraly málimet taraǵannan bastaldy.
Kúndelikti shyǵatyn Iltalehti basylymynyń habarlaýynsha, tek tańǵy asqa Sanna Marın aıyna 850 eýro jumsaıdy eken. Bul shamamen 445 myń teńgege jýyq. Buǵan deıin rezıdensııadaǵy tańǵy as shyǵyny shamamen aıyna 300 eýro bolǵan. Basylym shyǵynnyń munshalyqty ósip ketkenine tańǵalyp, Sanna hanymnyń áreketi qanshalyqty zańǵa saı degen saýal tastaıdy.
Iltalehti taratqan aqparatty premer-mınıstrdiń keńsesi de rastady. Soǵan sáıkes 2020 jylǵy qańtardan 2021 mamyr aralyǵynda resmı rezıdensııaǵa túnegende S.Marındi bir ret tamaqtandyrýǵa jumsalǵan qarajat 14 363 eýro 20 sentti quraǵan. Osylaısha, aıyna shamamen 845 eýro ketken eken. Premer-mınıstr keńsesi taratqan málimdege súıensek, buǵan tańǵy as pen tiskebasar berilgen.
Al Sanna Marınniń ózi eshqandaı zań buzbaǵanyn, quzyretin artyq paıdalanbaǵanyn aıtyp otyr. Onyń sózine sensek, 2019 jyly premer-mınıstrlik mindetine kiriskende ýáde etilgen qyzmetterdi ǵana paıdalanǵan.
«Árıne, buǵan qatysty eshteńe bilmeımin. О́ıtkeni tańǵy asqa bólinetin qarajatqa qatysty zań buzýshylyq bolǵan emes», dedi ol Fınlıandııa telearnalarynyń birine bergen suhbatynda. Sondaı-aq ol buǵan deıingi premer-mınıstrler de tańǵy as aqysyn paıdalanǵanyn atap ótip, máseleniń anyq-qanyǵyn naqtylaý qajet ekenin jetkizdi.
Osyǵan baılanysty Helsınkı qalasynyń polısııa qyzmeti is ashatynyn, qanshalyqty zań buzylǵanyn anyqtaıtynyn habarlady. Quqyq qorǵaý organdarynyń aıtýynsha, másele premer-mınıstrdiń ózinde emes, keńse qyzmetkerlerine qatysty bolýy múmkin. Sondyqtan sarapshylar Sanna Marınniń qyzmetinen ketýi ekitalaı ekenin aıtyp otyr.
Fınlıandııada týyndaǵan daý jaıly oqyp otyryp tańǵalasyń. Bylaı qarasań, premer-mınıstr «túıeni túgimen» jutqan joq. Zań aıasynda qarastyrylǵan tańǵy asyn ǵana ishedi. Qysqasy, bıýdjet qarajatyn bosqa shashpaǵan.
Onyń ústine, Skandınavııa elinde sheneýnikterdiń bıýdjet qarjysyn paıdalanýyna qatysty janjal birinshi ret bolyp otyrǵan joq. Byltyr Fınlıandııanyń qarjy mınıstri Katrı Kýlmýnı medıatrenıngke qatysý úshin bıýdjet qarajatyn jumsaǵany talqyǵa túsken soń, qyzmetinen ketken edi.
Sol joly da shashaý shyqqan tıyn joq. Bári tıesili jerine jetken. Biraq bıliktiń jumsaǵan ár tıynynan habardar Fınlıandııa qoǵamy úshin bul mańyzdy. Bul – birinshiden. Ekinshiden, Skandınavııa eli sybaılas jemqorlyqty jeńgen memleketter qatarynda. Onyń ústine, eldi basqarýǵa atsalysyp júrgenderdiń kóbi – kileń jastar. Máselen, úkimet basshysy Sanna Marın 36 jasta. Joǵaryda aty atalǵan Katrı Kýlmýnı 34-te. Premer-mınıstrdiń orynbasary Annıka Saarıko 38-de, ishki ister mınıstri Marıa Oısalo 36-da, bilim mınıstri Lı Andersson 34 jasta.
Sondyqtan shyǵar, atalǵan el álemdegi baqýatty da baqytty el sanalady. Máselen, BUU ázirlegen «Álemdegi baqyt zertteýinde» Fınlıandııa qatarynan tórtinshi jyl shartaraptaǵy «qoı ústine boztorǵaı jumyrtqalaǵan meken» atanyp otyr. Zertteýdi júrgizgender jer-jahandaǵy 149 eldiń azamattaryna saýalnama júrgizip, baqyt deńgeıin baǵalaýdy suraǵan.
Aıtpaqshy, atalǵan zertteýde Qazaqstan týraly da málimet bar. Saýalnama boıynsha «toǵyzynshy terrıtorııany» mekendegen el 36-satyǵa jaıǵasqan. Iаǵnı bul – halyqtyń baqyt jónindegi pikiri. Biraq áleýmettik qamtamasyz etý, jeke bas bostandyǵy, ishki jalpy ónim kólemi men sybaılas jemqorlyq máselelerin eskere kelgende, elimiz 45-orynǵa syrǵyǵan. Osyndaıda fın qoǵamy mınıstrlerdiń tańǵy asqa jumsaǵan bolmashy qarjysyn talqylaǵanyna qarap otyryp, elimizdegi keı sheneýnikterdiń «búıeni búgimen, túıeni túgimen» jutyp júrgeni eriksiz eske túsedi. Zańnyń ústemdigin ornatpaıynsha, fın dostardyń deńgeıine jetýimiz ekitalaı-aý...