Petropavlda sý tasýshy kóliktiń júrgizýshisi turaqta turǵan jeńil avtomobıldi qaǵyp, ol qabyrǵany tesip ótti, dep habarlaıdy Egemen.kz.
Oqıǵa baqylaý kameralaryna túsken, jazba áleýmettik jelilerde jarııalandy. Kadrlarda júk kóligi artymen qozǵalyp bara jatyp, turaqqa qaraı burylǵanyn, odan ary qabyrǵa aldyna qoıylǵan jeńil kólikpen soqtyǵysatynyn kórýge bolady. Jol-kólik oqıǵasy saldarynan jeńil kólik qorshaýdy tesip ótti. Oqıǵa kezinde kóshede bir áıel ketip bara jatqan.
SQO polısııa departamentiniń baspasóz qyzmeti arnaıy tehnıka júrgizýshisi jaıaý júrginshini qaǵyp ketpeýge tyrysqanyn, sondyqtan kólik turaǵyna tez arada burylǵanyn habarlady. Saldarynan eki avtokólik zardap shekti, olardyń biriniń búıiri zaqymdaldy.
«2021 jyly 5 maýsymda «ZIL 431410» markaly kólik quralynyń 56 jastaǵy júrgizýshisi artpen júrip bara jatqanda manevrdiń qaýipsizdigine kóz jetkizbeı, róldi basqara almaı «Qyzyljar Sý» AQ turaǵynda turǵan kóliktermen soqtyǵysty. Saldarynan eki avtokólik zaqymdaldy - Volkswagen Golf jáne Ravon. Zardap shekkender joq, júrgizýshi mas bolmaǵan», dedi Petropavl polısııa basqarmasy ókilderi.
Vedomstvo málimetinshe, jol-kólik oqıǵasy deregi boıynsha «ZIL 431410» avtokóliginiń júrgizýshisine qatysty QR ÁQBK 610-baby 1-bóligi boıynsha ákimshilik materıal jınalyp, Petropavl qalasynyń mamandandyrylǵan ákimshilik sotynyń qaraýyna joldanady.