Eýropalyq Odaq Belarýske tıesili áýe kompanııalarynyń qart qurlyqtaǵy barlyq áýe keńistigi men áýejaıyn paıdalanýǵa tyıym saldy. Buǵan resmı Mınskiniń Ryanair kompanııasyna tıesili ushaqty bortta bomba bar degen jeleýmen qondyryp, oppozısııa belsendisi Raman Pratasevıchti tutqyndaýy sebep boldy.
Eýropalyq odaq elshileri ótken jumada osy máselege qatysty kezdesip, ortaq uıǵarymǵa kelgen eken. Soǵan sáıkes budan bylaı Belarýs áýe kompanııalarynyń ushaqtarynyń qonýy men ushýyna ruqsat berilmeıdi. Sondaı-aq senbiden bastap 27 múshe memlekettiń aýmaǵynan ushyp óte almaıdy.
Eýropalyq avıasııalyq qaýipsizdik agenttigi (EASA) Eýropalyq Odaq elderine tıesili ushaqtardyń Belarýs áýe keńistiginde ushýyn nemese onyń aýmaǵyna qonýyn shektep otyr.
Esterińizde bolsa, Raman Pratasevıchtiń tutqyndalýyn halyqaralyq qoǵamdastyq qatty synǵa alǵan edi. О́z kezeginde Eýropalyq Odaq buǵan qatysty shara qabyldaıtynyn jetkizgen-di.
British Airways burynǵy atqarýshy dırektory, qazirgi tańda Halyqaralyq áýe kóligi qaýymdastyǵynyń (Iata) bas dırektory Vıllı Ýolsh áýe saıahatynyń saıasat quralyna aınalǵanyna alańdaýshylyq bildirdi.
«Eýropalyq áýe kemelerine Belarýs áýe keńistigin paıdalanýǵa tyıym salý da – avıasııalyq qaýipsizdikti saıasattandyrýdyń kórinisi. Bul áýe qatynasy salasyn damytpaıdy. EASA tyıym salýdy alyp tastap, áýe kompanııalarynyń ádettegideı jolaýshy tasymaldaýyna múmkindik berýi tıis», deıdi ol.
О́tken aıda EO basshylary oqıǵaǵa qatysy bar adamdarǵa ekonomıkalyq sanksııa salý jóninde sheshim qabyldaǵan. Endi Brıýsseldegi dıplomattar kelesi aptada sheneýnikter men uıymdardyń tizimin naqtylamaq.