Elordadaǵy Ulttyq mýzeı qorynda kórnekti memleket jáne qoǵam qaıratkeri О́zbekáli Jánibekovtiń ańyz bolǵan ótkir qaıshysy men bákisi saqtalǵan.
Atalǵan eki jádigerdi murajaıǵa 2015 jyly Almatyda «Ulttyq mýzeıge syı tartý» aksııasy aıasynda ardaqty azamattyń nemeresi Azel Baýyrjanqyzy tapsyrypty.
Qaıratkerdiń «ótkir qaıshysy» týraly ol kisiniń qaramaǵynda istegen nemese shákirti bolǵan azamattar «jyr» qylyp aıtady. Aǵamyz aldyna kelgen kez kelgen mátinnen qate kórse nemese unatpasa dál osy qaıshymen qyrqyp tastaıdy eken. Bul jaıynda belgili ǵalym, ádebıet synshysy Qulbek Ergóbek «Bas mýzeıshi» atty maqalasynda áserli baıandaıdy. «Mýzeı isinde ekspozısııalyq jospar jasalady. Ádette, О́zekeń jasaqtalyp jatqan mýzeı qyzmetkerlerin senbi ne jeksenbige shaqyratyn. Shaqyrǵan ýaqytynda baramyz. Jazǵanymyzdy aldyna qoıamyz. Ol kisi shımaılaı bastaıdy. Bizdiń bastapqy jazýymyzdan tamtyq ta qalmaıdy. Bizdi qoıshy, qyzdy-qyzdymen ózi jazǵan betterdi de qaıta shımaılaýǵa kirisedi. «О́zimen birge jasasyp kele jatqan» (M.Joldasbekov) uzyn qaıshysy bolady. Sonymen álgi jazylǵan paraq-paraq jazýlardy qyrqady, jelimdeıdi, mashınkaǵa beredi. Tasqa basylyp, qaıta oralyp kelgen mátindi qaıta jóndeıdi. «Apyr-aı, bul kisi de sharshaı ma eken?» dep oılaıtynbyz ári-beriden soń…» dep jazady Qulbek aǵa.