Qazaqstannyń ishki ister mınıstrligi polıseıler úshin ázirlengen jańa úlgidegi formany kórsetti, dep habarlaıdy Egemen.kz Polisia.kz silteme jasap.
Formany ázirleý kezinde polısııa qyzmetkerleri úshin barynsha yńǵaıly kıim jasaýǵa basa nazar aýdaryldy, ər túrli klımattyq jaǵdaıda qyzmet atqaratyn qyzmetkerlerdiń tilekteri eskerildi, sondaı-aq álemdik tájirıbe zertteldi.
Qyzmet atqarýdyń ereksheligi men jaǵdaılaryn eskere otyryp, jańa úlgidegi forma dızaıny men qurylymyna qaraı patrýldik polısııa qyzmetkerlerine, syrtqy qyzmet qyzmetkerlerine jáne ishki ister organdarynyń basqarý apparattaryna arnalǵan kıim bolyp toptastyrylǵan. Memleket basshysynyń ýchaskelik polısııa ınspektorlarynyń mártebesi men tanymaldyǵyn arttyrý jónindegi tapsyrmasyn oryndaý sheńberinde olar úshin jańa kıimniń jeke jelisi ázirlendi.
Polısııa basqarmalary apparattarynyń áıel qyzmetkerlerine arnalǵan kıim jazǵy kezeńde kııýge arnalǵan kóılekpen tolyqtyrylǵan. Qyzmetterdiń barlyq sanattary úshin «POLISIA» jaryq shaǵylystyrǵysh jazýy bar jazǵy, maýsymdyq jáne qysqy kıim úlgileri jasaldy. Qyzmetkerlerdiń aıaq kıimi alǵash ret ózgertildi.
Krossovkalar túrinde usynylǵan taktıkalyq aıaq kıim aıaqqa yńǵaıly, aıaqty jaraqattanýdan, syrǵanaýdan qorǵaıdy. Qalalar men oblystardyń emblemalarynyń negizinde kıimniń oń jeńine óńirlik japsyrmalar ázirlendi.
Buıymdardaǵy jıektiń túsi qyzyldan kókshil túske aýystyryldy. Metall buıymdar – jetondar, emblemalar, juldyzdar toqyma buıymdaryna aýystyryldy. Jaryq shaǵylystyrǵysh elementterge erekshe nazar aýdaryldy.
Jańa formany engizý qosymsha qarjylandyrýdy qajet etpeıdi. Oǵan aýysý aǵymdaǵy bıýdjettik baǵdarlamalar sheńberinde jáne eski formanyń tozýyna qaraı kezeń-kezeńimen júzege asyrylatyn bolady.