Memleket basshysy Qasym-Jomart Toqaev Qazaqstanǵa resmı saparmen kelgen Reseıdiń Federaldyq jınalysy Federasııa keńesiniń tóraǵasy Valentına Matvıenkomen kezdesý ótkizdi, dep habarlaıdy Egemen.kz.
Kezdesý barysynda Qazaqstan men Reseı arasyndaǵy kópjaqty strategııalyq seriktestik pen odaqtastyqty nyǵaıtýdyń, perspektıvalary talqylandy. Sonymen qatar saýda-ekonomıkalyq, mádenı-gýmanıtarlyq yntymaqtastyqqa, eýrazııalyq ıntegrasııaǵa jáne eki eldiń koronavırýs pandemııasyna qarsy kúrestegi birlesken kúsh-jigerine qatysty ózekti máseleler sóz boldy.
Memleket basshysy Federasııa keńesiniń delegasııasyna iltıpat bildirip, Valentına Matvıenkonyń elderimiz arasyndaǵy ekijaqty qatynastardy damytýǵa jáne nyǵaıtýǵa qosqan úlesin joǵary baǵalady. Sondaı-aq TMD Parlamentaralyq assambleıasy keńesiniń tóraǵasy qyzmetindegi jemisti eńbegine toqtaldy.
Prezıdent zań shyǵarýshy organdardyń Qazaqstan men Reseı arasyndaǵy baılanystaryn jaqyndatýdaǵy rólin erekshe atap ótti.
«Parlamenttik dıplomatııa memleketaralyq yntymaqtastyqty damytýda úlken ról atqarady dep sanaımyn. Bul ásirese, Qazaqstan men Reseı Federasııasy arasyndaǵy yqpaldastyqqa qatysty. Biz úshin dostyq, odaqtastyq baılanystar negizgi basymdyqqa ıe», dedi Qasym-Jomart Toqaev.
Sonymen qatar Prezıdent Federasııa keńesiniń tóraǵasyna elimizde iske asyrylyp jatqan saıası jáne ekonomıkalyq reformalar jóninde aıtty.
Áńgimelesý barysynda Qasym-Jomart Toqaev Reseıdiń halyqaralyq arenadaǵy ornyn nyǵaıtý isindegi Vladımır Pýtınniń saıası baǵytynyń mańyzdy rólin atap ótti.
«Vladımır Pýtınniń myqty ári bedeldi basshylyǵymen Reseı Federasııasy halyqaralyq arenada ózin álem elderi sanasatyn jáne onsyz birde-bir mańyzdy halyqaralyq problema sheshilmeıtin memleket retinde tanytty», dedi Qasym-Jomart Toqaev.
Valentına Matvıenko Prezıdentke kezdesýge múmkindik jasaǵany úshin shynaıy rızashylyǵyn bildirdi.
«Sapar aldynda Vladımır Pýtınmen sóılestim. Ol Sizge júrekjardy sálemin joldady. Sondaı-aq Sizderdiń senimdi ári shynaıy qarym-qatynastaryńyzdy joǵary baǵalaıtynyn aıtty. Qol jetkizilgen barlyq ýaǵdalastyqtardyń júzege asyrylatynyn naqtylady», dedi Federasııa keńesiniń tóraǵasy.
Budan bólek Valentına Matvıenko elordamyzdan alǵan áserimen bólisti.
«Kezinde Vladımır Pýtın Nur-Sultan qalasyn qazirgi zamannyń ǵajaıyby degen edi. Shyn máninde, qala kóz aldymyzda kórkeıip keledi. 6 shildede qala kúnin atap ótetinderińizdi bilemin. Sizdi jáne Nur-Sultan qalasynyń barsha turǵynyn kele jatqan merekelerińizben quttyqtaımyn», dedi Valentına Matvıenko.
Sonymen qatar Valentına Matvıenko Qasym-Jomart Toqaevqa Parlament Senatynda jáne Májiliste ótken kelissózderdiń qorytyndylary týraly aıtty.
Kezdesý sońynda Qasym-Jomart Toqaev reseılik áriptesi Vladımır Pýtınge shynaıy iltıpatyn bildirip, ystyq sálemin joldady.