Prezıdent Qasym-Jomart Toqaevtyń byltyrǵy Joldaýynda bırjadaǵy saýda-sattyqty tártipke keltirý týraly tapsyrmasy júzege asty, dep habarlaıdy Egemen.kz.
Memleket basshysynyń baspasóz hatshysy Berik Ýálı Facebook paraqshasynda Prezıdent bergen tapsyrmalardyń oryndalǵany týraly kezekti málimet jarııalady. 2020 jylǵy halyqqa Joldaýynda Qasym-Jomart Toqaev bırjadaǵy saýda-sattyqtyń el ekonomıkasyndaǵy róline toqtalǵan bolatyn.
«Bırjadaǵy saýda-sattyqty tártipke keltirý kerek. Bul eń aldymen munaı ónimderi, elektr energııasy, kómir saýdasyna qatysty. Bul saladaǵy iri kompanııalardyń kózboıaýshylyǵyna jol berýge bolmaıdy», degen bolatyn Prezıdent.
Berik Ýálıdiń málimetinshe, sol tapsyrma aıasynda vedomstvoaralyq konsýltatıvtik-keńesshi organ – Bırja komıteti qurylǵan.
«Naryq qatysýshylary bırjalyq saýdaǵa kedergisiz kirý úshin aýqymdy túrde oqytylýda. Bırjalyq taýarlar tizimine munaı ónimderiniń toby, sonyń ishinde bıtým engizildi», dep jazylǵan ınfografıkada.
Prezıdenttiń baspasóz hatshysy bıyl 31 naýryzda benzın men bıtým bırjalyq saýdaǵa shyǵarylǵanyn eske alady.
«24 mamyrda kómirdiń qoljetimdi shaǵyn partııalary óńirlik operatorlarǵa satyla bastady. 16 maýsymda taýar bırjalaryna, bırjalyq jáne bırjadan tys baǵa belgilenimderine monıtorıng júrgizetin Ahýaldyq ortalyq iske qosyldy», dep jazylǵan málimette.